Oté

In lwa voui mé odrémié in lwa pou lo drwa o travay !

Justin / 11 désanm 2014

Ni fini arpa di, tèlman néna pou di, minm si ni koz a titré, nora touzour pou azouté si shomaz la rényon. Sé in plé pou vréman pou nou, nout to d’shomaz sé in boubou pou nout tout boudikont é an plis sé in boubou ki géri arpa konm sa vik sé nou ki bat lo rokor partou dan la frans, i prétan nou lé promié dan so séktèr, sanm pou mwin ni pouré san pasé, inn ont pou nou. Zot i wa in pé klèr la d’si ? Mi wa pa mwin. Pou bann jènn, sak i travay pa i di i fo léspérians, mi an diskonvyin pa mé koman awar léspérians si toué la zamé travay ? In kass tèt. Sak néna diplom, souvan-dé-fwa i di na tro, parl pi pou sak na pwin, bann sénior néna in métié osi i réss san. Zordi na pwin inn i pé di ki pé pa ariv a mwin osi tonbé èk shomaz. Lo shomaz i toush nout tout parlfèt, minm sak i travay i dwa sousié a li, ou travay zordi, mé domin ? Konbyin lantropriz i fèrm, pou inn i rouvèr pétèt dis i fèrm.

Koman a ou paran inn ousinonsa plisièr zanfan zordi, na pwin traka si lavnir bann marmay ? Koman in paran sérié i pé dor trankil si son zoryé, san zèt éstrésé kan i mazinn domin ? Kèl solisyon pou bana ? Pou shap la dan gouvérman i vyinn fé in trouvay, i sar fé in lwa pou otoriz travay lo dimansh. I vé, la pokor voté. Ala lo romèd mirak. Zordi nou lé an plin dodan. Travay lo dimansh ? Dopi lontan i ral larlik la d’si. Si i fo rouvèr lo dimansh, si i fo pa rouvèr ? Néna i di si i rouvèr la boutik lo dimansh va anbosh domoun pou travay. Pou dot lé pa tro sir, Ispouré konm ispouré pa. Néna plisièr son la d’si. In létid la fé pou Pari i di lé pa oblizé ditou néna lanbosh, ryin zordi i pérmèt di nora lanbosh. In pé dann gouvérman osi i tik.

Mé in lwa poukoué ? In lwa pou otoriz travay lo dimansh ? Konm si domoun i rofizré travay, konm si travay néna an poundiak. Komanss par fé travay domoun an sominn déza. Kèl larzan domoun va dépansé lo dimansh si i travay pa la sominn ? Zot i konpran a mwin mi sipoz. Mi di shish, in lwa voui, mé odrémié in lwa pou fé travay domoun toultan pa solman lo dimansh. Pétèt in lwa konm néna pou la kaz, pou la kaz néna lo drwa o logman oposab, pou travay osi i fodré in lwa, pou lo drwa o travay sinploman.


Kanalreunion.com