Oté

In mansonz mèm répété mil foi… i rès in mansonz !

Justin / 11 octob 2012

"Mansonz la pate lé kourt" ! Souvan dé foi moin la ékri sa. Kréol i apèl sa in patoi, Fransé i apèl sa in provèrb, bann Zalman i apèl sa sprichwort. Anfin tout lang na shakinn son mo pou di mèm shoz. Kan i di mansonz la pate lé kourt, sa i vé dir in mantèr i doi fé trap ali vitman. Mé, moin la antann osi, in sèrtin Goebbels, in nazi, téi di si ou i répète in mansonz mil foi li dovien in vérité.
Pou kosa mi di sa ? Pars dopi moin nana mon konésans, moin la fine antann manti dsi lo kont Parti kominis é pa arienk in foi. Pou kosa ? Sinploman pars, dé foi, lo mansonz i ranplas zargiman dann la politik é in mansonz kont Parti kominis, in pé i konsidèr sa konm in n’afèr léjitime.
Dsi koué i manti ? Dsi la kantité larzan in moun i gagn ! Dsi sak li la di é mèm dsi sak li la pa di ! I kalkil koman tord sa konm linz lavé pou fé dir ali kékshoz li la pa di. Dsi l’anbisyon la pèrsone ! Dsi lo mank l’anbisyon ou sinonsa lo tro d’lanbisyon ! Dsi in prétandi zanbèk parti la pass par isi ou sinon par-la ! Astèr nana sak i antan dir désèrtènn shoz é i pran sa pou larzan kontan é zot lé étoné ké la pèrsone i parl pa dsa. Zot i fé l’étoné ziska dir zot i konpran pa pou kosa Parti kominis i fé pa son l’otokritik. Mé pétète zot lété pa la kan li la fé. Pétète zot la pass zot tan pou ramas bann rago fané in pé partou dann zournal la droit, dann télé ou sinonsa dann radyo, dsi internet épi d’ot landroi ousa bann kominis i trènn pa zot savat dé doi. L’èr-la, i sifi ou i pran po d’shanm pou pla kouvèr pou k’ou égziz k’i fé in l’oto kritik. 
Mé par l’fète ou lé pa kominis sansa ou lé pi. Ou i lir pa “Témoignaz” sansa ou lir pi. Ou i frékant pa bann militan dan la lite, sansa ou i frékant pi. Donk demoun i pé an avoir konfyans dan ou ! Mé lé bien domaz, ni vé, ni vé pa, in mansonz mèm répété mil foi… i rès in mansonz*.

NB : mèm si i mank pa z’afèr konmsa dan la press la droit.

 Justin 


Kanalreunion.com