Oté

In marsh an aryèr diréksyon in nouvo l’ésklavaj

Justin / 19 mé 2016

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, d’apré sak mi oi, zot la trouv in nouvo shoval pou vanj kont lo gouvèrnman. Sé la loi travail. Kosa o-jis i roprosh so loi-la ? In bonpé z’afèr mèm siprime lo droi bann travayèr pou romète azot lo pyé, avek lo poin anmaré, a la dispozisyon lo patron. Soman oila kékshoz k’i tienbo pa d’bout pars gouvèrnman la fine tir dann loi-la tout mézir téi konvien pa bann sindika é lo bann patron i di konmsa lo loi sé in kokiy vid. Na pi arien dodan pou libèr lo travaye.donk in loi pa itil, pa éfikas, karéman in loi pou in po d’patat. Tok ! Pran sa pou toi !

Justin la fé pou répons :

Mon vyé matant k’i koz la boush rouvèr, moin lé a d’mandé ousa vi sa tir sak ou i ékri : diréktoman dann lo boit z’idé lo médèf. Pars d’apré sak mi antan na rairnk lo médèf pou koz konmsa : alor arète avèk bann z’akor par bransh pou diminyé lo pouvoir bann sindika, roganiz in z’éléksyon par z’antropriz késtyonn modifyé la diré dlo travaye, diminyé lo pèyman bann z’èr siplémantèr, sa i kont pou la po d’patat sa ? Tir manzé dan la boush bann travayèr, amar azot dsi z’ot post travaye in pé plis ankor, koup lo trant sink èr, sa i fé pa mal bann travayèr épi z’ot famiy sa ?

La p’asé mèt ankor ! Mi sort oir in nouvèl dsi in l’abatoir volaye dann l’amérik. Konm la shène bann pti shèf i vé pa k’i arète é konm la natir isi é la-ba lé parèy, bann z’anploiyé la désid mète koush. Konmsa la shène i arèt pa é bann shèf i gingn z’ot prime... Matant vi oi a kèl dégré nou lé randi. Olèrk an avoir plis libèrté demoun nana moin-z’an moins. Sé lo shomin trasé pou l’avnir ? Si sé sa, mèrsi pou l’éskavaz modèrn. Tok ! Pran sa pou ou !


Kanalreunion.com