Oté

« In mèrsi i ékorsh pa la boush ! »

In kozman pou la rout

Justin / 7 séptanm 2016

Dèrnyé foi, moin la fé lo komantèr lo kozman « la politès lé né avan nou ! » é zordi mi propoz azot fé travaye z’ot koko dsi lo kozman lé marké an-o la. Pou kosa mi propoz azot sa ? Pars moin la romarké, dopi in pé d’tan, nana bonpé d’moun i bash Lo mèrsi. Mèm bann moun mi oi tou lé zour, mèm mon famiy prop, kisoi zanfan, kisoi ti-zanfan i bash in pé tro souvan so pti mo zantiy la. Poitan in mèrsi lé bien itil dann la rolasyon rant demoun an sosyété. Mèm kan i domann aou nouvèl out santé ou i doi réponn : « Moin lé bien, mèrsi ! ». Si i done aou in pti kékshoz ; dizon in pti bonbon Loryo, i fo ou i di mèrsi. Bann kroiyan i di pa : « Mèrsi bondyé pou lo bon ropa ou la done amoin » ? Dann nout savoir-viv kréol rényoné lo mèrsi nana in bon plas é tro zap ali lé pa bon ditou pou la rolasyon rantre nou. Moin lé sir na d’ot sivilizasyon i koné mèm pa lo mo mèrsi, mé sa sé z’ot afèr. Dann la n’ote la pa konmsa é mi pans sa lé bien bon pou nout tout ansanm.


Kanalreunion.com