Oté

In min i lav l’ot, sé sa la solidarité !

Justin / 20 mars 2013

Matant Zélida la ékrir Justin :
Mon shèr nové, mon spès salté, rouj de fon dovan l’éternité,
Na in n’afèr i dépas amoin ! Sé koi ou i koné ? Sé k’in pé i pas zot tan pou dir nana bonpé d’moun mizèr La Rénion, bonpé d’moun dann bézoin épi zot na arienk lo mo solidarité dan la boush, sansa ko-dévlopman, é la plipar d’tan, sé d’moun déor k’i bénéfisié so solidarité-la, é i obli demoun isi lé dann difikilté. In bon solidarité, sé in solidarité rantre nou, solidarité avèk moun déor, sé gaspiyaz. Alon atann kan nou sar plin o zas, pou nou èd lé zot. Tok ! Pran sa pou toi !

Justin la fé pou répons :
Mon vié matant k’i koz touzour la boush rouvèr,
Souvan dé foi, mi antann di z’afèr konm sa. Mi souvien, in zour, Konsèy minisipal Sin-Dni la vot in l’èd pou Madégaskar. Lo mèr, afors demoun té i agoniz ali, l’arété. Shak foi navé siklone, dann tan Paul Vergès, Konsèy réjional té i vèrs in l’èd bann sinistré Madégascar ; L’ariv osi kan l’avé tranblemann tèr épi dan d’ot ka. Li l’avé tor ? Pou moin non, pars l’avé d’moun ankor plis dan la difikilté ké nou é té i falé èd banna. Na in foi, dann tan la MCUR, la done in kou d’min dan l’Ind pou in l’aksion kiltirèl. Nou l’avé tor ? Non, nou l’avé rézon pars sa té in métod pou viv an bon l’intélizans avèk nout voizinaz épi bann péi nout z’ansèt té i sort. Nou l’avé mil foi rézon ! Si ni atann kan nou sar plin o zas pou fé avans in pé la solidarité, mi pans la pa domin la vèy pou in mond solidèr. Pars oplis in moun konm in pèp nana, oplis zot i vé an avoir. Oplis zot i oi pa koman zot i sa tir in pti katsou dsi zot avoir pou èd sak na moin ankor. Tout fason, i di pa sé bann moun na poin tro moiyin pou moiyéné lé solidèr plito ké bann rish ? I di pa galman, sak lo boujaron lé plin v’atann lo vant i pèt pou sokour in pé lé zot ? Vré pa vré, mi koné pa. Shakinn i oi l’èr dsi son mont braslé. Tout fason, in min i lav l’ot. Sé sa la solidarité. Tok ! Pran sa pou ou !

Justin


Kanalreunion.com