Oté

In ministrèz k’i fane fos nouvèl ?
I tak son boush, sansa i shap avèk !

Justin / 7 désanm 2009

La vi lé konmsa ! Tazantan lé dos, tazantan lé mol... Ankor mi tonm pa dan la déprime avèk dan la tète in syèl noir é mèm pa in pti boute blé, sansa in n’ote koulèr k’i rann la vi in pé zoli. La vi lé konmsa... Dé foi, ou i aprann in bon nouvèl, sak ou i pans pou ou sé in bon nouvèl. L’èr-la, ou i pète dé flam ! Dé foi ou i aprann in mové nouvèl, sak pou ou sé in mové nouvèl. L’èr-la, ou i rante dann out kokiy konmsi ou la pi anvi sortir !
Mi arvir in kou déssi sak la éspassé na inn-dé somènn... lo trikmardaz déssi tram-train. Nou, bann partizan, nou la viv sa konm in kou d’kouto dann do.Nou la komans par dir : « sa i sorte dann zournal la droite ! Donkalor, konm d’abitide lo tit lo lartik i zir lo tantine lo konténi ». Mé, aprésa, kan nou la ésèy démonte in pé lo tik-tak, lo konplo, nou la konprann, koman in vyolasyon nout droi pou l’égalité i pé fé kapote in projé konm sa. Dizon, i mète karbiran dann rézèrvoir loto, épi i pèrs la rou konm sa i gingn pa avansé... Sa té in mové nouvèl pou vréman !
Dé troi zour aprésa, nana la démanti : in lète promyé minis La Frans la ékrir Prézidan la réjyon, pou li anons l’Etat i shanj pa pozisyon. Tram-train, pou li, sé in gran shantyé, pa aryink pou La Rényon, mé galman pou La Frans. konm pou dir "grenel l’anvironeman" la pa in tiyo pèrsé, sé in politik vréman kalkilé. Bin madam la ministrèz l’Outre-mèr la-dan ? El la fane fos nouvèl ! Sa lé grav, dann in sityasyon difisil ! In ninis sansa in ministrèz… sa i tak son bouh, sansa sa i shap avèk !

Justin

Inn-dé lésplikasyon
Mi arvir : mi arvyin, mi arparl
Trikmardaz : in z’afèr konpliké
I zir lo tantine lo konténi : i di lo kontrèr, sansa i di pa vréman la mèm shoz
Tak son boush : fèrm son také
Shap avèk : shap dan lé kane, shap avèk la mass.


Kanalreunion.com