Oté

In moniman pou bann z’am érante In n’afèr for, pou nou épi nout bann z’ansète !

Justin / 30 octob 2009

Kode noir-la, sa té in mové loi pou vréman, vi k’li té i "grav dan lo marb" konm de koi, in zésklav té pa in onm pou vréman, té in éspès rante demoun épi zanimo, é déssi la késtyonn droi, li lété in mèb té i pé ashté, vann, érité ziska. Parl pi lésploitasyon, parl pi lo kou banna té i gingn...
Dé foi, kan lo règléman lété pa totalman in-himain, lété lo bann mètr té k’i vé pa aplik pa... In légzanp ?
Solon lo kode noir bann mètr té i doi donn in l’édikasyon krétyène bann zésklav, fé batiz azot, amontr azot katéshis, maryé banna suivan la rolizyon, antèr azot dann simétyèr kan i ariv la mortalité...
Bann mètr té i pans, sa té in pèrdmann tan, in pèrdmann larzan... zot té i fé pa sa inn tyork, épi kan in zésklav té i mor, lété pa difisil antèr ali konm zanimo krévé, san tonm pou insi dir, san sèrkèy, san kroi, san plak pou konète kissa lé antéré so landroi-la, san sérémoni, normalman i fé kan in moun lé mor, konm di lo patoi, pou ramas l’ame lo défin.
Sé pou sa, nou kréol La Rényon, ni kroi nana an kantité bann zam érante, i plane dann l’èr,k an la nuite i vyin, sansa dann bann gafourn loin-loin. Souvan dé foi, nou lé krintif de zot... De tou-tan, moin té i souète, i pans bann mor-la, in zour dan l’ané. Mi sorte aprann in gran nouvèl : samdi, dann simétyèr père Lafosse, va batiz in moniman pou zot. Sa in n’afèr for, pliské for, pou nou épi nout bann z’ansète.

Justin


Kanalreunion.com