Oté

In moun intélizans
i miz pa zamé déssi in mové shoval !

Justin / 12 désanm 2009

Sa in zistoir dann tan l’avé ankor kours shoval La R’doute Sinn-ni. Sé dir azot si i komans daté ! Donkalor, dann tan-la, l’avé kours shoval lo dimansh, pandan la sézon. I prétan dir, in kantité d’moun té i vyin oir lo bann kours... mèm domoun té i sort déor ! Zot i koné, ki di kours shoval i di ossi paryaz... pa paryaz ofisyèl, mé paryaz konmsa, pou inn-dé katsou, pa plis, pars tan-la, demoun té i marsh pa avèk in bon pé larzan dann posh.
Bon ! Ala lo zistoir. Mon gro-pèr i sava lé kours èk mon papa, té ankor jènn dann tan-la. Ala k’gramoun, lo gaz i monte, i déside fé in paryaz èk in Morisyin, pou in bon moné... ké li l’avé poin. Zot i konpran koman mon papa lété trakassé. Mé lo vyé lé pa la èk sa. Ala dépar ! Pèf ! Kou d’pistolé i pète ! Bann shoval i démar. Gro-pèr i di lo Morisyin pran toute shoval si li vé. Pou son par, li pran aryink in shoval blan, té i nonm Verdun. Promyé tour... Verdun dèrnyé ! Dézyinm tour, Verdun dèrnyé ! Ay ! ay ! ay ! mon papa i pans son kèr i sava shaviré. Troizyèm tour... Verdun i raprosh, li koup inn, li koup dé, li koup troi, li donn lo grin mèm. Lign droite l’arivé, Verdun i dépass lo total-kapital, é li ariv promyé. Gro-pèr i di lo Morisyin : « Donn mon n’afèr issi ! ». Lo boug i done ali son moné. Verdun té i apèl shoval troi tour, lé z’ot té i galiz pa avèk li.
Pou kossa mi rakonte sa ? Pars in pé i trouv drol Prézidan la Frans i donn Paul Vergès bann gran-gran missyon é li fé pa konfyans bann moun son parti konm Didier Robert, konm d’ote brankignol ankor. Pou kossa d’apré zot ? Bin, lé sinp ! Pars in moun intélizans i miz pa zamé déssi in mové shoval.

NB : I sort pa nonm Paul Vergès prézidan in komité nasyonal pou déside lo tik-tak pou fèr fas bann shanjman klimatik ?

Justin


Kanalreunion.com