Oté

In moun lé pa adapté sosialman…

Témoignages.re / 28 janvier 2014

O fèt, sé li lé pa adapté ou sinon sé la sosiété ki fo rovoir ?
Nin pé i di sé lo serpan ki armorde sa ké…
Na in bout tan mi réflési ékri in nafèr ladsi ; mi trouv pa lo manièr ; anfin dawar lo frui té pa mir.
Moin lé antrinn lir in liv d’Alain Peyrefitte, kan li lété minis la Justis, lu ékri su la violans. Violans individièl, violans kolektiv.

In monmon i favoriz pa in zanfan plis kin not, i défavoriz pa non pli.
Dan son vant, kondisyon na otour i pé zoué po sort in marmay plito konm si ou konm sa.
Kréol i di a ou ; ti fé lo zanfan, ti fé pa son kèr.
Koman dan in minm fami, 10 zanfan, nin pé i apran lékol, nin pé i apran moin.
I paré minm, solon in garson lé né ant dé fi, sinon li lé lo dernié ; sinon léné ; solon koman li lé antouré dan la fratri i pé zoué si son dévlopman, son adaptasyon dan la sosiété.

E la kroi pa, la sitiasyon ékonomik i zoué in gran rol,non pa si télman.
Ti pé avoir délinkan dann fami ris.
Ti pé avoir intélizan biin intégré dann fami pov !
Arfé pa lo kou Marxistes : nana kapitalis ék prolétèr ; tout i raminn pa dé zafèr, blan-noir, vré-fo ; lo bon é lo pa bon.

Ou la giny lo bon kromozome ou pa ? Ifo ankor on bon fimié sosial, familial.
Dépi k lo monn lé monn, na lo andikap isi ou la. Rome té an lèr ,600 zan ; tro sivilizé, ginye pi kontrolé ; li la komans son listwar par la violans (Romulus é Rémus) lilar fini el la violans ! Bann barbar larbat a li.
I paré ankor, lo moun ifé in krime (ou in vol …) i artrouv a li an prizon, sé an prizon ke li réaliz a li ; sé la ke li artrouv a li dan son éléman ! La nou lé an plin dan la psikolozi !
Mé nora touzour moun pa adapté sosialman !?

 Justin 



Un message, un commentaire ?



Messages






  • bonsoir justin ; out ti lartik y interpelle à moin, à caise d’un pé moun y refé le papier collé zot parent , en bien ou en mal y dépend, na un papa la divorcé

    , lavé un tit garçon 8 mois, lu quitte ce femme là ; lu refé deux zenfants ek l’autre, lu quitte et le marmaille que lavé 8 mois y refé la même erreur 20 ans

    pli tard ; lu la pas gaigne installe à lu sosialman, à cause son papa ou quoié, reste à savoir quoué va devenir son pé zenfant à lu aussi.

    Article
    Un message, un commentaire ?






  • an fèt,moin lapans for in mamm ma propr fami:koman laplipar labiin an sort azot (a pépré),a li dé lo dépar ,li vé pa (ou li pé pa) : sété koué ?lo kromozome ?in sok utérin ?
    po asevé son monmon i mor ?
    pétèt li noré i bézoin son dé paran ziska samor ?!
    Va savoir !?
    Mi poz kestion,moin la poin réponss ;zordi li lé révolté : son médikaman anti-déprésyon li vé pi pran :"moin lé pa malad,mon kèr lébon, mon foi lé bon !"
    Li artrouv drol son nouvo psikiat idiali : "toué la fé si,toué lafésa...ifo kozé,ifofé sorti...mé ziska kan, ziska la mor.in vi lé konm sa.
    Anou akoté,nou siport ! koué ta fé ?

    Article
    Un message, un commentaire ?


Kanalreunion.com