Oté

In nafèr i paré pti, militiplyé kab nir gro !

Justin / 28 novanm 2013

I fo méfyé in ti zafèr i ariv a ou, ou i di sa la pa grav, lariv ryink a moin, sinon i tous mon famiy solman, sinon mon zanfan sèlman lé viktime.
An politik, ou i agard dan out kartyé, out vil, tèl zafèr i va pa, i mank, ou i di : « A, lé pa konpliké rézoud so difikilté… sinon, sa va pasé, domin i sra in ot zour, pasyans i géri la gal, tousala ».
Malérèzman, souvan, sak i ariv a ou i ariv bonpé domoun otour de ou, dot famiy lé tousé, dot zanfan la koni lo mèm problèm.
An politik, pa ryink out kartyé, pa ryink out vil na tèl anbara, i fo alé war pli pré, lo zafèr lé byin pli grav ki paré. Alon pran dé-troi zégzanp.
Pran lékol, in marmay i di a ou, zordi la kantine la done a li krevèt alor ke li la di li lé alérzik. Lo kolèz la apèl lo papa, la di vyin trap out zanfan, li lé malad, lo zanfan lé viktime in linzistis. Bon, mé konbyin marmay sra dan lo mèm ka ? Konbyin i manz pa bèf, coson, po késtyon rolizyon, i trouv dan zot pla sak zot i doi pa manzé ?
Si ou i agard dan out somin troi-kat zèn asiz, pars na poin travay, somanké souvan fine tonm dann zamal, lo pti koud sèk dépi lo matin, ti kroi k’la Rényon, na in sèl somin, in sèl kartyé, in sèl vil na somèr ? Sa i kont par di mil !
In vyé i tous inn ti rotrèt !? Mé konbyin konm li i giny a pèn viv, i trèn tou lo moi ?
Mi rod in lozman, mi trouv pa ! Konbyinn moun i rod in kaz po abité ?
In zétidyan lapré sèrs in sanm po li suiv liniversité, son famiy lé loin… mé konbyin d’zèn lé konm li ? Konbyin i doi arèt zétid ?
In nafèr i paré pti, miltiplyé kab nir gro !

 Justin 


Kanalreunion.com