Oté

In onm, in manda, in l’indamnité, ala sak la rézon i komann !

Justin / 8 zwin 2012

Moin na konm l’inprésyon, dan in kanpagn z’éléksyon, na in pé i fé in travay l’anbrouyaz la tète demoun. Zot i sèy fé kroir, avèk lo manda zot va gagné, zot i sava fé tout. Zot sé tout an mèm tan. Lo mèr, li ! Konsèy zénéral, li ! Konsèy réjyonal, li ! L’antropriz, li-mèm ! Ali mèm préfé ! Talèr sar li lo prézidan. Nana galman sak i sèy fé kroir anou zot lé z’ami-z’ami avèk in minis, avèk lo Promyé minis. Zot lé a-tu a-toi avèk bann moun i dirij la Frans. Sirtou ké zot i kroi pa sa, pars somanké sink minite pou koz èk zot lé riskab pa trouvé. Mi di sa pou bann sosyalis k’i mank pa brandi lo shifon l’amityé rant zot épi lo bann dirijan la Frans. Mi dékouraj pa zot, mé zot va oir lé bien konmsa. Vi k’dann pasé lété konmsa, pou koué sa i sava shanjé ?

Pou arovnir dsi bann z’élu, mi pans i fo zot i koné zot va gingn fèr solman sak lo bann tèks i done azot lo droi fé, é si zot i koné, i fo pa zot i fé kroir demoun sak lé pa vré. Pars lo moun li kroi sak zot i di, épi konm zot l’éspri lé anbrouyé par in bann parol lé pa vré, é bin, étone pa si domin i vien oir azot pou domann in n’afèr zot i pé mèm pa doné, ni fé doné. Mazine, domin, in moun i sava domann in dépité i pti kontra. Li pé pa done sa, donk li va fé in lète pou sak i pé done sa, é si i mète dann poubèl, la pa li l’otèr, bien antandi. Fé gingn in kaz, fé gingn in travay lé parèy. Alé tap dsi mové port é ou lé sir ou i gingn ar pa arien, mèm si nana pou doné. Pars souvan défoi, la poin arien !

Sof si lo dépité, lé mèr an mèm tan, soi li lé prézidan in ta èk in paké Konsèy d’administrasyon. Mé l’èr-la, lo boug na pas plis lo tan pou fé sak la pa son travay ké fé son travay. L’èr-la, sé bann fonksyonèr sar a la bar, épi bann z’élu i suiv déyèr. Souvan dé foi, sé sak i éspas. In moun, in manda, in l’indamnité, ala sak i fo, pars konmsa, lo boulo sar bien fé, é la pa la-dan lo ga va fé grosi son pla. Sa sé sak la rézon i komann, é mi pans lé pliské tan ète in pé rézonab.

Justin


Kanalreunion.com