Oté

In onte sa kant mèm !

Témoignages.re / 9 désanm 2009

Oté, non ! La pa possib, in n’afèr konmsa. Mi sort lir dann zournal, La Rényon, i ranvoy dann l’atmosfèr sé pa konbyin milyon tonn gaz karbonik... sa i fé gro-gro déga déssi la natir. Poitan, nou la poin gran-gran lizine ! Nout bann magazin lé pa tro gran non pli ! Alors kossa nou nana, foutor d’in sor, pou fé d’tor konmsa lo klima ?
Nou nana dé l’izine i tiliz sharbon pou fé kouran in bone parti dan l’ané… lo réstann tan, i bril la bagass. Nou nana, a-popré, troi san soisant mil loto, kamiyon, lo kar, traktèr… arzoute èk sa, l’avyon i poz, i lèv, i poz , i lèv a longuèr d’tan. Sa l’assé, a s’ki prétan pou nou polyé l’èr konmsa.
A oui ! Mi antann inn-dé, l’apré margogné… l’apré di zot nana aryink in pti loto, pti mèm… épi zot i ansèrv in boutèy lo gaz par moi. Arzoute èk sa, in sigarète zot i ral pi dépi k’tantine la di li ashté pi z’afèr konmsa... donk, konm di l’ote, si la pa moin sé l’ote. Alé pa rode lo pou dan la tète na poin shové.
Mé élas, ménélas, mon kèr lé an filas, kan la mèr va monté, li rode arpa la kaz kissa li sava noiyé... kan la shalèr va shalé, li sa pa triy la tète pou li shofé. Alors, nout tout i sava pran lo shok… é dir nana ankor inn-dé l’éstrévagué pou ète kont lo tram-train, pou vote kont lo plan pou l’otonomi énèrzétik… pars prézidan la réjyon lé pour. In onte, sa kant mèm !


Lésplikasyon inn-dé pti mo :

Foutor d’in sor : foutor mizèr ! outor va !

Lo réstann tan :
lo rèst l’ané

A longuèr d’tan :
i arète pa ditou

Margogné :
grongné

Triy la tète :
shoizi la tète

L’éstrévagué :
in bann fou


Kanalreunion.com