Oté

In parol bien itil sé in parol pou di la vérité, pa pou kashyète la vérité

Justin / 7 mé 2016

Mi koné pa si zot lé konm moin, mé kan moin l’apré lir in n’afèr lé z’ot la ékri-mèm in n’afèr moin la ékri !- mi domann amoin toultan si l’ékrivèr i di la vérité, sansa si li di in vérité, otroman si li lé pa apré dégiz la vérité san pour san. Donk mi gingn pa pran in n’afèr bit-an-blan, san kalkilé, pars mi trouv nésésèr an mèm tan ké mi lir, sèye fé l’égzamin-krétik sak moin l’apré lir otroman lo kozman moin l’apré ékouté.

Kan mi di sa, mi mazine in l’ansien minis l’édikasyon nasyonal dann gouvèrnman fransé an mèm tan k’in savan rokoni, épi in tète sipèr-plenn. Mi souvien k’in zour li té apré parl dsi l’éshofman klimatik é li té i di lé vré ké nana l’éshofman klimatik, lé vré ké dann la vi nout glob térés la konète désèrtènn péryod bien sho épi d’ot bien fré mé li téi di galman l’om na poin arien pou arprosh ali dann in n’afèr konmsa, la pa son l’aktivité ké la shof lo klima.

Dabor m’a dir azot sak li té i di lété bien di é son diskour lété konm i di tayé avèk in pti kouté pou skilpté. Mé li téi di zis lo kontrèr sak in bonpé savan téi di épi téi ékri. L’èr-la moin té a d’mandé kisa k’i di la vérité é kisa k’i koz o-sinonsa i ékri pou dégiz la vérité… kan in zour moin la fini par konète ké bann gran sosyété amérikène bann produi pétrolyé téi pèye désèrtin moun bien instruyé pou prézant bann z’étid k’i kol avèk z’ot z’intéré a zot.

L’èr-la moin la ropans in parol josé Marti, in gran patriyot kibin téi di in bon parol sé in parol pou di la vérité é pa pou kashyète aèl sirtou si out koz sé la koz di pèp.


Kanalreunion.com