Oté

In pé la tyé kouyon pou pran son plas !

Justin / 4 zwin 2014

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
Figir aou, mon névé, mi sort antann in n’afèr i pé fé plézir aou konm pa. Mi sort antann dann télé, bann marmay sak i vé, i pé pass in l’éprèv kréol pou lo bak. Mé la pa sa mi vé dir aou mi kroi ou i sava bate dé min pou sa. Sak mi déstine aou i vien apré é kosa i vien apré ? In komantèr lo zournalis : li la di konmsa, sé in moiyin pou gingn lo poin fasilman... donk ala lo bak kokotyé k’i rovien. Di pa moin kozman-la lé pa sifizan pou kass zot légzamin an kréol rényoné ! Moin mi pans ké oui é moin lé sir la mazorité d’moun sar dakor avèk moin... Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, si sak ou i di lé vré : lo frankofone i gingn lo poin fasil an fransé… Lo l’anglofone i gingn lo poin fasil an z’anglé, lo risofone parèy an rus. Brèf si ou lé dann la lang ou lé né, ou i doi gingn lo poin fasilman. Na poin sak lé fèb, na poin sak lé moiyin, na poin sak lé for. Matant ou i kroi pa in kozman konm sa lé bète, é pliské bète solon moin. Sak la di sa, son kozman i rosanm ali. Pars pou ou, out lang matèrnèl ou la pa bézoin aprann pou bien konète, ou i koné sa konmsa, san forsé, san fé travay out koko, san fé l’aprantisaz… Konm dann tan bann z’apote la mète a parl in pé tout lang pars Bondyé la fé mirak pou zot. Sa in mizèr antann demoun koz konmsa ! Sa in pityé antann sa ! Sé konmsi ou i artourn an aryèr, ou i artourn lo tan té i di lo kréol té in patoi san règ, san gramèr, san son sintax, san son vokabilèr prop, san son bann vèrb épi zot konzigézon.. in fraz i rovien amoin dann tousala. Sak in konséyé zénéral té i di : in pé la tyé kouyon pou pran son plas ! Tok ! Pran sa pou ou !

Justin

NB Pou sak sa i intérès l’éprèv kréol sé in l’éprèv dézyèm lang. Sé kant mèm kékshoz !


Kanalreunion.com