Oté

In pé lonèkté dan lo déba politik sré pa an tro !

Justin / 11 juillet 2013

Konm di l’kont, nana désèrtin i tyé kouyon pou pran son plas. Dizon zot na inn éskiz, par rapor i mank azot in sèrtin kantité la matyèr griz. Mé na in pé, si zot lé pa kouyon, zot i fé konmn si, épi sa i pèrmèt azot di ninport koi é an parmi kalomnyé lo mond. Pou kosa mi di sa ? Pars moin la antann dsi Antène Rényon, in gran zargouèt apré intèrviou madam Lebranchu, é an plin dann milyé lo lintèrviou, ala kosa li di.

Li di, Paul Vergès lé pou k’i siprime la sir-réminérasyon, é li domann la minis kosa èl i an pans. La minis i réponn, lé pa in n’afèr a l’ord di zour... Mi domann amoin mèm si èl i azout pa èl la diskit dé sa avèk nout kamarad. Mank de po pou lo zournalis, konm pou la minis, Paul Vergès, si mi tronp pa, la zamé di in n’afèr konm sa. Li la di plizyèr z’afèr, konm la sir-réminérasyon lindèks koréksyon lé ménasé, é i fo pa La Rényon i pèrd larzan dan sèt afèr. Li la di osi, nana in défayans par rapor lo prinsip linité la fonksyon piblik, pars na poin okin tèks i rokoné lo droi bann fonksyonèr téritoryal toush so lindèks koréksyon. Li la ankor d’ot shoz dsi la shèrté la vi par rapor la sir-réminérasyon. Mé li la zamé di sak la fé dir ali dann télé Antène, konm dann Rényon Promyèr san alé vérifyé sak li la di pou vréman.

Dizon si bann zournalist Antène té i vien in pé pli souvan konférans de près Parti kominis épi sète Paul Vergès, pétèt zot nora pi réspèk in pé la vérité... Sé pa pou nout kamarad mi di sa, pars mi sipoz li lé vaksiné kont sa, pars mi koné pa in moun la été pli kalomnyé ké li ; Kan li la di lotonomi, in pé la antann lindépandans. Kan li la di la bidèp, in pé la di koup pa nou. Kan li la di la kopérasyon interkominal, in pé la parl "ponp a frik", étsétéra-étsétéra, mé bann léktèr nout zournal i koné sa.

Ni arèt la, mé pou bann demoun bien konprann lé shoz, in pé lonèkté dan lo déba politik i fré pa d’tor La Rényon épi bann Rényoné, boudi kont, i fré pa nou d’tor.

NB : Madam Lebranchu, ou i parl anou lo tèks. Ou na rézon ! Mé ou i pé dir amoin si ou i koné in tèks i prévoi lindèks korésyon pou in zournalyé kominal titilèr… dopi na pi lo fran CFA isi La Rényon, dopi 1975 si mi tronp pa ?

Justin


Kanalreunion.com