Oté

In plan pou okip bann déshé : éspéron sar kékshoz byin !

Témoignages.re / 31 octobre 2009

In pé i apèl sa z’ordir.In pé i apèl sa déshé. Pandan lontan, kréol l’apèl sa la salté : té i ramass la salté, té i zète la salté,souvan dé foi té i bril la salté. Na lontan sa ? La poin si tèlman lontan vi k’in pé la fé sak i apèl in l’insinératèr... I prétan dir, sa in bébète z’afèr i bril vèr é sèk.

Pou kossa i bril ?Pars i ansèrv pa aryin ?

Non va, an kontrèr nana i bon pé z’afèr pou tir la-dan si ou i donn aou la pène... Mi koné in péi, i apèl La Suisse, banna i rosikl, kan i fé lo triyaz, plis sinkante pour san bann déshé, é pou lo rèst i artir ankor kisoi lo gaz,kisoi léstrésité, kisoi mèm bann matéryo pou fé la kaz., arzoute ankor konpost pou mète dann zardin...

Poitan, in pé i vé bril tou sa-la, par l’fète konm i bril la salté. Mé i sousyé pa si lé mové pou nout l’èr ni réspir don ? I kass pa la tète pou d’moun néna l’oprésyon don ? I sousyé pa lo réshofman klimatik don ? Arzoute èk sa toute sort kalité mové konsékans sa i pé an avoir pou l’imanité... La pa bon, mon bann dalon, la pa bon sa !

I paré... Touléka, moin la lir dann zournal, konsèy zénéral i sava mète an l’èr in plan pou okip bann déshé. Mi oz éspéré, va fé in bon n’afèr, byin bon pou nou épi in bon légzanp pou nout bann voizin... Akoz pa ? Si ni tyinbo d’ète in laboratoir l’anvironeman, pou l’imanité, lé pa pou la po patate, mé pou k’i ansèrv vréman kékshoz byin.

Justin


Kanalreunion.com