Oté

In politik i pé pa tir anou dann l’anboulkidi, pars dépi lontan li la fine trouv son bout !

Justin / 27 avril 2011

Zour pou zour, moi pou moi, ané pou ané, la sityasion bann Rényoné i amélyor pa. Pa pli loin ké samdi, moin la antann inn-dé shif l’INSEE la marké déssi La Rényon. Nou lé bien dann malizé ! Dé dann ta, la mark amoin : nana karant nèf pour san dmoun déssou lo sèy la povreté, épi nana san karant kat mil zanfan i viv dann bann famiy pov. San fé lo gran kalkilèr, ni pé dir nana in zanfan déssi dé i viv dann in famiy nana difikilté pou joinn lé dé bout par lo milyé.

Biensir, tout famiy nana zot sistèm gouvèrnans par zot mèm ; Moin lé mèm sir, la mazorité bann famiy i fé sak i fo pou sèy done bann zanfan in vi akséptab épi pou sèy amène azot dann lo méyèr shomin possib. Moin lé sir ossi, nana in bonpé famiy, dépi lontan, la fini dékourazé. É koman fèr otroman si ou na poin in kaz par ou mèm, kisoi in kaz a-tèr kisoi in kaz anlèr. Koman fèr otroman si la famiy la poin son l’otonomi pou roganiz son vi, si i viv la kaz papa-momon, si na poin in bidzé otonome pou zéré, si la famiy i gingn pa rotrouv aèl pou èl mèm, é si nana in bonpé pou pass témoin lo pli pti kontrayété, lo pli pti déplézir. Poinn moiyin pou tak baro déssi lo brui i sort l’ékstèryèr.

Bien antandi, lé bon z’ète an famiy, kan ou lé an parmi, pou in fète. Kisoi in sanblani, kisoi in fète Pak, kisoi in sèrvis malgash, kisoi ankor in fète mizilman, kisoi in fète pou fété soloman ! Tazantan lé bon, mé pa tou lé zour, pa lo matin, épi lo soir, épi ankor lo matin, épi ankor lo soir, épi bann gran zourné long konm in zour san ri-kari-lo-grin. Kèl projé d’famiy i pé an avoir ? Kèl projé pou l’avnir ?

La politik gouvèrnman la France, gosh konm droite, lé bien koupab, é bann konplis sir plas lé bien koupab galman. Bien koupab sak la pa konprann é i vé pa konprann, i fo, konm diré l’ot, la riptir, avèk in politik la fine done sak li pé doné, in politik i gingn pa tir anou dann l’anboulkidi, pars li la fine trouv son bout.

 Justin 


Kanalreunion.com