Oté

In politik sa ? Sansa in zé d’ponp ?

Justin / 13 mars 2010

Kan la fé la route tamarin, Konsèy réjional la domann k’i anbosh in kantité Rényoné. Konm sa mèm, plizyèr santène pèrsone la gingn travay. Si zot l’avé poin la formasyon k’i fo, zot la parti fé formasyon, épi aprésa zot la travay. Té in bon n’afèr ! Arzoute èk sa, si in bann, san konprann, l’avé pa poz lanspèk, banna noré trouv travay toutsuite déssi shantyé tram-train. Gouvèrné, sé prévoir, é Konsèy réjyonal l’avé prévi !
Domaz in bann la poz lanspèk, épi lé shoz la pa déroul konm té i dovré !
Bin l’Eta, dann tousa-la, kossa li fé ? Li zoué lo zé la plipar d’tan. Tazantan nana in n’afèr i klosh pa. I prétandir EDF i sava konstrui in lizine la-ba dann Por. EDF, sé l’Éta pou insi dir, pars sé l’Éta lé propriyétèr d’sa.
Ala ké sé in l’antropriz poloné i sava fé lo travay, mé pli pir, i di sé bann pèrsonèl va sorte la Pologne va vni fé sa issi… é bann travayèr rényoné va doboute-guète azot travay.
Zot i apèl sa in bon politik zot ? Pou moin, sé plito in zé d’ponp, pou roul anou dan la farine.

 Justin 


Kanalreunion.com