Oté

In porte i fèrm, in n’ot i rouv !

An parlan l’inyon Progré-PCR

Justin / 9 séptanm 2015

Van-t’yèr soir moin lété in rényon. Lété in rényonn politik. La plipar té bann rouj é té pré kozé dsi sak té i fé nout l’aktyalité, anou parti kominis. Konm i di osi parti bann rouj-de-fon. Donk té apré anparl la lis l’inyon avèk Lo Progré.… Dann la près do droit i apèl sa in zanbrokal, i di mèm manzé koshon osinonsa i pa arien.

In kalmarad la di : rapèl anou bien ! Nana troi moi solman kout sondaz, kout l’artik, kout foto té i parl arienk Didier Robert, Thierry Robert, Igète Bélo é nou la-dan ? Nou té pa la. Téi koz pa de nou. Nou té i égzis pa. Parti kominis té mor, bon pou in l’antèrman, pa an promyèr klass siouplé, dovan la kroi l’égliz sinploman konm dann tan l’égliz té i béni lo kor bann kominis. Tan-la lé fini bien antandi. Mé alon arvir dsi nout sizé !

Troi moi apré, nana in gro l’oraz i ménas la droit. Lo sant avèk Thierry Robert i bat la zèl dann vid. Igète Bélo lé la, é Anète i fé in binonm avèk li. Mé Anète oplis i sava, oplis li aparète konm in divizèr, é Igète konm sak la trayi son famiy dann la politik… Mank de po, la pa sa l’arivé, in n’ot l’inyon l’apré fé son shomin. Mèm bann zournal la droite i rokoné l’inyon-la konm kékshoz i kont.
Konm lo kozman i di bien : “In porte i fèrm, in n’ot i rouv ! “



Inn modékri, inn ti lavi, inn komantèr ?



Bann modékri andann forom






  • Lé vré osi si lé dé té i rouv an mem tan, tout sak dann malizé noré rantré pli vite, é pi mi azout osi dann nout péi i fo pliskin révolsyion politik trankil ; bien sir, progressis lo politik i trass lo gran line kom k’i di , mé i koman espliké lo bann lantair pou ariv dsi lo térin ? lo bann kombatan ké la litté avek lo ker, la foi, la rézisté o mépris dé toute la roprézantation kapitalis ; i kompran pa ké lo vérou lé touzour là pafois meme avek la komplisité de sertin ké la oubli lintéré zénéral pou sov zintéré personel. i fo nou réflési sériézman la dsi.

    Article
    Inn modékri, inn ti lavi, inn komantèr ?


Kanalreunion.com