Oté

In program ! Kèl program ? In lidéal ! Kèl lidéal ? Dé valèr ! Kèl valèr ?

Justin / 28 mé 2013

Avan yèr soir, lo mèr Sin-André la pass dann télé. Moin la pa bien konpri pou kosa banna, toudinkou, té i done ali la parol. Biensir, li la di li sava sézi la Kour éropéène bann droi, pars d’apré sak li di, légalité dé shans rant bann kandida lété pa asiré pou zéléksyonn’mèr 2014.
Lo droi, sé lo droi, lo rèv, sé lo rèv, é lé rar inn é l’ot i rankont konm sa dan la vi... Sanm pou moin, son rokour na poin la shans pass in promyé baraz i apèl la rosovabilité... tout fason, nou va bien oir sa san tro atann.

Dann télé, lo tantine la poz ali in késtyon dsi rokin. Li la komans par di li lé pou la défans la natir. Mé kan la domann ali si li té dakor avèk Thierry Robert k’i vé élimine in bonpé rokin, li la di li lé pa mèr Sin-Lé, donk li pé pa ziz mésyé Robert. Kan la di ali madam Bello i intérès la késtyonn rokin, li la réponn èl lé mèr Sin-Pol, donk sa i intérès aèl. L’èr-la moin la komans domann amoin si lo moun té pa apré amèn anou an plansh a voil, ou sinonsa an bato si zot i vé. Moin lé a d’mandé, si rokin l’avé atak in moun Sin-André, kosa li nora di… pétèt li noré pi an avoir in l’opinyon so zour-la. Ala in vis-prézidan in parti avèk in bonpé l’anbisyion pou li pèrsonèl, mèm pou son parti k’i ranvoy tout bann problèm dsi lo mèr landroi... In drol fason minisipaliz tout késtyon.

Touzour dan lo lintèrviou, la domann ali si son parti l’avé in shans gingn zéléksyon Sin-André. Biensir, li la di oui... pars solon li, son parti nana in program, in lidéal épi désèrtènn valèr. In program ? Dopi kan, vi k’i ranvoy zour apré zour, moi apré moi lo famé program. In kamarad la di amoin, dsi lo sit lo parti, i ranvoy a pli tar la késtyonn program. Li na in idéal ? La pa lidéal kominis touléka, donk in lidéal k’i pé shanj tazantan suivan lo van. Li na dé valèr ? Mé la pa sèt la rokonésans ! Mi pans pa.

 Justin 


Kanalreunion.com