Oté

« In pti gou d’pa z’asé ! »

In kozman pou la rout

Justin / 24 séptanm 2016

Si zot sé bann jenn moun moin lé sir zot i doi pa konète sa, sansa zot la fini antann mé zot i fé pa in kont ansanm. Si zot i aprosh sansa si zot lé dann troizyèm az, moin lé sir zot i di sa. Pa toultan mé rant-rant. Dabor sa sé in konpliman pou lo kuizinyé sansa la kuizinyèz : sé pou dir son manzé lé bon, si tèlman ké pétète v’ariv a manké sirtou si na in gran bataye kouto-foi shète, rant demoun i tranm pa dovan graton. A ! Manzé ! Sa sé in n’afèr i okipe nout tan sa : kisoi avan manzé, k’i soi dan l’apré, kisoi ankor kan ou nana in pti kré dann l’éstoma. Oté ! Si marsh dann in vil konm Sin-dni, ou na l’inprésyon demoun i manj toultan : samousa li ! Nem li ! Salad lo frui li ! Sandwich li ! Si na in pé nana in bon l’arondisman la pa touzour la maladi, souvan sé in késtyonn bon apéti Alé ! Mi éstop tèr-la. Bon-apéti toulmoun si lé l’èr pou ranpli lo bouzaron !


Kanalreunion.com