Oté

In pyé d’boi san rasine ? Lo van i zète ali a-tèr !

Justin / 25 mé 2013

Dan mon pyé d’kèr, na in doulèr i apèl MCUR. Mi sipoz moin lé pa tousèl. Mi majine in bonpé d’moun La Rényon nana mèm doulèr ké moin. Pou kosa ? Pars in n’afèr konm sa, na poin in bonpé pèp té i pé an avoir é zordi lo prozé la tonm an pane... Mi souvien kan lidé lé éné dann komité santral Parti kominis. Moin la pans tout suit, sa in lidé jényal.

Moin la pans sa, mé an mèm tan, moin la konprann l’avé arienk in minorité d’moun té i san zot lété konsèrné par sa épi té désidé pou ète in aktèr dann trin-la. Pou kosa ? Pars moin lé sir, in bonpé té i pans la kultur i pé pa ète in poin santral la politik nout parti. Pars pou in bonpé, lé zot problèm lé si tèlman inportan ké la kultur té i pas pou in poin sogondèr. Rapèl azot, dann radyo épi dann zournal, in pé té i domann ronons la MCUR pou fé la rout litoral, mèm si té i gingn mèm pa fé in kilomèt la rout avèk lo larzan. Mèm in moun la di amoin, si i kout lo pri in lisé, i vo myé fé in lisé anplis... Konm par azar, sak la mèt in poin final avèk la MCUR la mèt osi in poin final èk la konstriksyon bann lisé.

Donk zordi, lo projé lé an ta mèm si bonpé travay la fine fé, mé tardra viendra, i fodra fé ali. Kansréti pou bann nouvo zénérasyon konète in pé myé listoir nout péi. Kansréti pou konète ousa nout zansète i sort, koman zot l’ariv shé nou, koman zot la viv, zot la travay, zot la lité. Sa lé inportan sa ? Biensir, sa lé inportan, pars gnor in n’afèr konm sa, sé pa gingn dirij anou dan lo prézan épi l’avnir ! Konète nout listoir ? Sa lé inportan, pou évit bann pyèj nout zansète épi nou mèm la fine tonbé. Konète nout listoir ? Sé konète nout rasine... in pyé d’boi la poin rasine, lo van i zète ali a-tèr.

NB : Pou kosa mi anparl de sa ? Pars dann in rényon zédi soir, in kamarad la di, i fo ni réfléshi pou bien konprann kisa ni lé, ousa ni sort, ousa ni sava. Aprésa, li la di ankor, si la MCUR té la, noré té pli fasil pou nou... mé voila, li lé pa la. Sé pou sa ni doi travay ankor plis pou myé konprann lé shoz.

Justin


Kanalreunion.com