Oté

In rézistan i marsh pa dann soulyé dominèr !

Justin / 11 séptanm 2014

Matant Zélida la ékrir justin :

Mon shèr nové, mon spès salté, rouj-de-fon dovan l’étèrnité. M’a dir aou, franshman, na in n’afèr la kontant amoin pu d’vré, pou d’bon. Kosa i lé d’apré ou ? Sinploman in pti fraz lo préfé i sort partir la di an partan. Li la di konmsa : « Bann rényoné lé jantiy ! ». Sa i fé plézir amoin pars in préfé sé in gran bononm é kan li di sa, la pa an foutan, la pa non pli san réflèchir. Kan li di sa, sé dann lo pli profonn son kèr... Kaziman dann son pyé d’kèr. Nou kréol bourbon nou lé onète, nou lé jantiy, ni koné rosovoir. Ala nout kalité !.. Sof pétète pou bann rouj-de-fon, pars zot lé pa parèy ké lé zot. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, mi pans ou sar pa étoné, si mi pran pa lé shoz konm ou. Pou kosa ? Pars mi pans i fo ète jantiy avèk sak i mérit out jantiyès, é i fo rann la parèy sak i mérite pa out politès, out jantiyès é out bon akèy. Sa sé in promyé zafèr !.. In dézyèm, sé kan in moun nana in pouvoir, é in profé na pouvoir, i fo li égzèrs sa avèk zistis é moin la poin lo santiman profé-la té in om just. Troizyèmman, lo préfé sé in égzékitan la politik lo gouvèrnman, é kan li égzékite in mové politik i fo pa li kont dsi kréol pou bate la min.
Trojour, moin té apré pansé, bann profé i vien isi, konm bann gouvèrnman-gosh konm droit-na in misyon. Kèl misyon d’apré moin ? Sé ranfors lo boulé dann pyé bann rényoné… Kèl boulé ? Lo boulé pou anbar anou dann shomin nout dévlopman, dann shomin nout résponsabilité, dann trin nout liberté. Lé pa difisil pou zot konprann kisa lé avèk zot é kisa lé kontre zot, donk i fo divizé pou régné. Par la mèm, zot i oi kisa lé jantiy é kisa lé pa : in rézistan lé pa jantiy avèk lo pouvoir, li lé pa non pli konpréansif, li na in koz pou défann é li doi pa marsh dann soulyé bann dominèr...
Tok ! Pran sa pou ou !

NB In blag pou la rout, moin la tir sa dann in bann désiné : in ga lé dsi l’bor shomin, koté in flak delo. In loto l’apré pousé, èl i pass dann basinn lo : « shouaaaaa... » Ala lo boug tranpé dépi an-o zisk’an ba avèk lo la bou. Dégomé konm pa dé, lo ga i di : « Eskiz amoin, moin la pa fé éksopré ! »... Ala in boug jantiy ! Na poin pli jantiy ké sa !


Kanalreunion.com