Oté

In sèrtin Romel Broon : Toute sak lé barbar i soulèv lo kèr !

Justin / 26 octob 2009

Zot i koné z’istoir-la ? L’istoir in moun kondané a mor, la-ba, dann l’amérik, so gran péi démokratik – konm di Pierre Peyret, dann in shanson– la déside tyé ali avèk kouran. Sa lé kouran sa la-ba ! An plin dann milyé son miz-a-mor, la fé in pane l’éstrésité... i prétan dir l’ashèv ali kout la bouji. Sa i pé fé rir in pé ! Mé sak l’ariv Romel Broon, moi d’séktanm i fé moin rir. In Tribinal l’Amérik la déside pik ali konm i pik in z’animo, kou d’ séring ranpli la poizon... Kan la rode in vènn, la pa trouvé. Dë z’èr d’tan la rodé mèm, la pa nyabou trouvé… Lo kondané, la byin édé, vi k’li la fèrm lo poin byin séré, konmsa in vènn va gonflé. Zéro kalbas ! Inn-tiork,mi di azot !
La déside tir ali dann la shanm l’égzékissyon, pou armète ali dann, sak i apèl, "l’anti-shanm la mor". Banna la byin romèrsyé ali pou son onèkté, épi la di ali :"Inkyète pa, va arkomans in n’ote foi !"... Mi rakonte zistoir-la, pou k’ni obli pa koman so mond sivilizé, konm i di, lé ankor si tèlman barbar, koman pou in pé, in vi sa i konte pou la po patate.
Byinsir, mi koné la pa aryink l’Amérik nana la pènn de mor. Mi koné galman la pa solman sa la barbari. Solman, moin pèrsonèl, mi gingn pa fé lo triyaz dann la barbari é toute sak lé barbar i soulèv mon kèr. Pa moin solman, mi sipoz !

Justin


L’ésplikasyon inn-dé pti mo :

Kou’d : (sansa kou’t)... Kou d’pyé, kou ’poin, kou d’sintir, kou d’tète...
Sa lé kouran : i ariv souvan dé foi.
L’onèkté : (l’onèt’té) la politèss.
Pou la po patate : i konte prèss pa.


Kanalreunion.com