Oté

In sign pou nout dévlopman, an pansan byin nout z’ansète !

Justin / 12 novanm 2009

Onz novanm, sa in zour inportan pou l’istoir La Rényon. Byinsir, sé la date l’Armistis la guèr 1914-1918, mé pa solman sa : nana ossi l’anivèrsèr la révolt bann zésklav Sin-Lé l’ané 1809, sa in konba pou la libèrté sa ! Nana ankor la fin lo tan bann zangajé té i sorte l’Inde, 11 novanm 1882, sa ossi i konte pou nou. An plis ké sa, sète ané, pou la promyèr foi, in l’avyon A380, pli gro l’avyon ké nana dann le mond, i vyin poz Gillot pars Air Austral, nout konpagni rézyonal, la komann dë l’avyon konmsa.
Dépi komansman nout l’istoir, nou la konète l’ésklavaz... Avèk lo tan, nou la sort la-dan. Nou la konète lo tan z’angajé, nou la sorte la-dan galman. Nou la konète lo tan lo kolonyalism, é nou té i doi sorte la-dan dépi l’ané 1946... mé nou la pankor gingn sorte konplètman dann trin-la, vi k’nou la pankor dévlop konm k’i fo noute l’ékonomi é nout sosyété. Zordi nou na in bon l’éspoir sorte la-dan, épi marsh dann shomin lo dévlopman dirab san dévir le do avèk nout bann z’ansète.
Alors lo onz novanm sé l’okazyon pou nou,pou byin mazine nout bann z’ansète, pars i fo touzour pans banna vi sak zot la fé pou nou épi konm i di souvan dé foi, in pyé d’boi i doi an avoir bon rasine pou byin tyinbo d’boute. Ala pou kossa, solon moin, lété in bon n’afèr d’mazine tout bann z’angajé épi bann révolté l’ané mil-ui-san-nèf… sar in bon garanti pou l’avnir... L’avnir lé dann dévlopman dirab, sa ni koné, é lé shoz i sava dann bon sans, é nou nana in bonn shans oir nout péi rolèv la tète. Donk, lo passaz lo gro zoizo an fèr sé in bon sign. In sign nout dévlopman lé an marsh san dévir lo do avèk nout z’ansète.

Justin


Kanalreunion.com