Oté

In sistèm néo-kolonyal ! Kézako ?

Justin / 22 avril 2016

Moin la trouv sa dann ti-liv nout parti la fé pou lo soisant-dizyèm anivèrsèr la loi 19 mars 1946. Nana in l’ésplikasyon é moin la parti lir lo l’ésplikasyon : moin la trouv sa i vé dir in nouvo kolonyalis mé pou kosa la Rényon lé dann in rézime néo-kolonyalis. Pou kosa ni pé dir kolonyalis fransé avèk éropéin la sort par la port épi la rant par la fénète ? Pou kosa ni pé di sa ?

Lo kolonyalis sé in sistèm k’i pèrmète pa lo péi a dévlop ali par li mèm. Lé vré ké ziska 1946 nout péi la pa vlop ali par li-mèm. Pou kèl rézon ? Parslo péi kolonyalis la obliz lo péi fé sak li téi vé : li vé kafé ? Bin plant kafé ! Li vé do-sik ? Plant kann. Li vé vanna ou son bann prodiksyon ? Bin ashté son bann prodiksyon. Li vé kass lo rin out prodiksyon, Bin li kas l orin é li fé shant aou son l’ime nasyonal sou la toil son drapo.

Kan li rant par la fénète, kosa li fé ? Li mate in pyèz pou fé ashté aou son bann prodiksyon osinonsa lo bann prodiksyon éropéène. An pliské sa konm li sé in péi kapitalis, li vé banna i anrishi azot. Donk i anvoye lo l’arzan dann lo péi konmsa lo l’arzan i rotourn dan La frans épi dann l’erop dan la mal bann kapitalis.

Nouvo, kolonyalis, kolonyalis tou kour ? tout fason ou lé pri dann l’arozoir.


Kanalreunion.com