Oté

In sort baba-shifon pou fé pèr zoizo-bélyé dann karo mayi

Justin / 1er août 2009

Bann goloi l’avé pèr lo syèl té i tonm déssi z’ot tète. Dann moiyin-naz, demoun l’avé pèr bann boulé an pyèr té i fé tonm gro-gro plui. Sink konséyé la droite la gingn la krintiv l’asanblé unik z’ot shèf, prézidan Sarkozy, i propoz pou bann départman l’outre-mèr.
Avan yèr, bann konséyé la réjyon épi bann konséyé zénéral la fé in gran séans travay, in zourné pou diskite déssi z’éta-zénéro, pou dir kossa zot i anpans. In manyèr fé konète koman zot i oi lavnir La Rényon. Sa in bon n’afèr pars i pé dir l’opinyon konsèy zénéral épi konsèy rézyonal, sa lé inportan, an tou-tan, é sirtou dann in tann kriz. Pars sa i pé éklèr in pé la route bann rényoné i èm byin konète dann kèl sans z’ot péi i sava, dan kèl sans li lé viré.
Solman, la pa toulmoun i pans konmsa. In pé, konm di lo patoi, i kalkil mantèr vi k’sa sé in manyèr pou fé pèr kréol épi byin plas azot pou zéléksyon rézyonal. Pou mon par, mi kroi pa banna la pèr l’asanblé unik, mé mi pans plito zot i majine demoun La Rényon i pé an avoir pèr. In sort shifon rouz pou fé monte lo gaz bann toro an shalèr. Pli pir, in baba-shifon pou fé pèr zoizo-bélyé dann karo mayi.

Justin


Kanalreunion.com