Oté

In téléférik dann Sin-Dni : Vyé motar ké zamé !

Justin / 24 zwin 2013

Somenn dèrnyèr moin la anparl bann Morisien i sava fé in téléférik dann in landroi i apèl sèt kaskad. In moiyin transpor intérésan pou demoun i abit dann landroi épi pou bann touris i vé vizit lo kartyé. Pou kosa moin la di sa ? Pars Moris i sava fé son métro lézé, avèk lo téléférik, mi pans sa in bon manyèr pou divèrsifyé lo bann kalité transpor. 

Dann mon rézoneman, moin téi konstat bann Morisien na in manyèr pli intélizans ké nou pou trouv in solisyon pou zot problèm déplasman. Solman pétète légzanp lo téléférik té pa lo myé shoizi pars, mèm somenn, mi oi dann télé in prozé téléférik pou rolyé La Montagn èk la vil Sin-Dni. I pé di sa in bon zafèr é bann moun la mazine in n’afèr konmsa la fé in bon kalkil... Si mi di azot, sa in propozisyon Parti kominis é na in bonpé d’tan, zot lé kapab dir amoin sa lé pa vré. Poitan lé bien vré é sa i prouv nout parti la pa arèt réfléshi pou trouv solisyon pou mèt La Rényon dann shomin dévlopman.

Bon ! Ni sava pa fé toutin pla èk sa, mé ni pé kant mèm di sak lé fézab dsi La Montagn Sin-Dni i pé fé osi dann d’ot kartyé la vil konm Brilé, Sin-Fransoi, Boi d’Nèf... Pars romark azot bien Sin-Dni lé antouré par in bann montagn donk nana pou fèr. Mé sak i pé fèr dsi Sin-Dni i pé fèr osi dann la komine Sin-Pol, Sin-lé, Sin-Jozèf épi d’ot zandroi. I fo di La Rényon na la form in kone, li lé plat dann son baz é li grinp firamézir.

NB : Moin, pèrsonèl, moin la parti dann in péi i apèl La Suiss é moin la romark lo trin i pass près partou, kisoi lo trin tradisyonèl, kisoi lo métro, kisoi lo trin avèk krémayèr, kisoi téléférik ou sinonsa d’ot sistèm ankor avèk in kabine i dsann é in n’ot i mont avèk in kroizman dann milyé — i apèl sa funikilèr é sa lé a bète non pli ! —. Par rapor d’ot, nou lé an rotar apré an avoir fayi ète an avans. In rotar, sa i pé ratrapé sa... Konm in onm politik, son foursh la langé, la di in foi : vyé motar ké zamé !

 Justin 


Kanalreunion.com