Oté

In Tournoi foutball bann zil chagos ! In pétisyon dsi la toil !

Justin / 16 zwin 2014

Na poin tro lontan, moin la lir in modékri dann zournal é moin la trouv té i suif la fès mondyal fotbal. Moin la trouv lo ga la fé sa, l’avé poin tor san-pour-san. Solman sré tro long zpou zordi pou di in bonpé z’afèr dann in pti modékri. Mé konm di lo kont,l’éspor la touzour été konmsa. Par plas in pé i vant ali pou lo bann valèr li dévlop, par plas in pé i di sa in manyèr détourn l’atansion par raport bann vré problèm, é fé pèrd azot l’èr pou pèrmète in pé ésploit azot san pour san. Zot i an souvien sak bann z’anprèr romin téi di ? Té i di bann romin té i kontant azot avèk do pin épi bann zé d’sirk..té sifizan pou boush zot zyé.

Mé défoi, konm di lo kont i pé an avoir in mal pou in bien. Komansa ? Lé sinp, mi sort oir dsi internet in pétisyon sou la form in tournoi foutbal. Sé in ga i apèl David Vine i lans sa. Li di konmsa pou l’opinyon mondyal : akoz lo pèp shagosien na poin lo droi partisip la koup di mond ? Pars li lé pa rokoni par bann gran nasion é anpliské sa, tout shagosien lété shasé dann bann péi étranj. Donk ala in pé d’moun i anprofit la pèryod la koup di mond pou fé myé konèt ankor lo problèm bann shagosien... Dann l’anglétèr bann péi lé pa rokoni la fé zot lékip foutbal épi zot i roganiz in tournoi i apèl « Tournoi bannzil Chagos ». Sak va gingn lo tournoi Chagos va alé bate in karé dann Brézil, épi pou pèy lo voiyaz i invit demoun tout péi vèrs in moné pou so tournoi-la. Moityé larzan v’alé pou rékonpans in lékip ; moityé larzan v’alé pou ède lo GRC Ollivier Bancoult kontinyé son konba..

Sa la pa in krak sa, mé la vérité pou vréman Mi pé asir azot : alé dsi lo site « let us return in chagos ». É zot va oir in ta z’afèr pou ankouraj bann chagossien é si zot i pans sa in n’afèr itil, zot i pé donn zot moné, mèm in pti larzan lé bon, bann ti ruiso i fé bann gran rivyèr. In pétisyon i ansèrv touzour in n’afèr... Bann z’organizatèr la bézoin réini vinn-sink mil dolar pou bien amenn zot projé
é sirtou obli pa sa in larzan pou in bone koz, sète in pèp lété shasé dabnn péi étranj i vé rotourn shé zot. Zot i koné kosa i rès azot pou fé ? Bin alor fé.

Justin

NB Arzout èk sa nora in pri pou sak va désine in tenu pou lékip foutbal Chagos- troi shèk sink san éro lé prévi pou sa...


Kanalreunion.com