Oté

In transpor an site prop… avèk in karbiran sal !

Justin / 23 zwiyé 2010

La droite blé avèk son mèm konplis blé-blan-roz la déside siprime lo tram-train, pou ranplas par dé mil kar. Konm Didier Robert la di, sa i doi z’ète in transpor an site prop… pa prop dann sans la propreté, mé lo kar va roul dann son bann voi rézèrvé. In tan té i di, oussa k’i gingn, éstèr i di partou, dann bann vil, dann bann vilaz. Mi pans pa v’alé, konm di lo konte, dann l’ilète pandiyé.
Avèk kossa li va roulé ? Avèk lo GPL*, donk lénèrzi fossile, donk in gaz k’i intoksik l’èr avèk son gas karbonik, k’i provok konm nout tout i koné l’éshofman klimatik. Arzoute èk sa, i fodra ni pèy sa avèk bann z’inportatèr vi k’sé zot va fé vnir sa konm zot i fé vnir lésans, gazoil, lo fuel, pétrol épi lo gaz.
Paul Vèrgès, pou son par la touzour défann nout l’otonomi énèrzétik avèk bann z’énèrzi ronouvlab, prop dann lo sans la propreté : lo van, solèy, la mèr, lénèrzi zéotèrmik, san konté lo biogaz. Konmsa, ni pé éskiv bann pétrolyé, pa dépans nout larzan pou aryin épi amors nout dévlopman dirab. Lé intéréssan sa pou nou, konm pou toute péi, toute l’androi k’i vé vanj kont l’éshofman klimatik.
Mé l’UMP avèk Didier Robert, é lo parti blé-blan-roz, i sousyé pa d’sa, zot lé pa la èk sa. Zot i vé pa fash avèk bann pétrolyé, gran profitèr déssi la tète bann Rényoné. Tanpir si pou sa, i fé in transpor an site prop avèk in karbiran sal.

* In pti romark : la-ba, dan la Frans i siprime firamézir bann kar i marsh avèk GPL (gaz pétrole liquéfié). I fé mèm pi lo kar konmsa, avèk bann motèr fé pou sa. Sak i kroi pa, li na ka alé déssi Internet (tap sinpléman transport collectif au GPL — mi di pa zot plis !).

Justin


Kanalreunion.com