Oté

In vizite la ministrès l’Outre-mèr : I mète pa lo shate pou vèy sosis !

Justin / 27 novanm 2009

Oté, lé ga ! Mi ansouvyin, lo sis novanm, Prézidan Sarkozy l’apré fé son kont-randi déssi z’Éta-zénéro, l’apré di bann désizyon li la prann : inn-dé désizyon inportan, sof konm nout parti i di, in bann fénète rouvèr, mé la porte lé ankor také zordi... é in moun byin i pass pa par la fénète. Donkalor, an plin dann milyé son diskour, ala k’li di li nonm madam Penchard konm ministrès l’Outre-mèr... Oté, baba ! Mi rakont pa zot la fyèrté l’ot lété d’dan. Mé par l’fète, tan-myé pou èl, tan myé pou lo prézidan, vi k’sa i kontant azot ! Solman, mi kroi pa ditou madam-la i partaz bann z’idé déssi dévlopman andojène, la koopérasyon rézyonal, la promosyon bann jène, konm d’ote ankor... Pou nout par, nou la touzour défann so bann z’idé-la, é la Droite la touzour vanj kont sa. Donk, la ministrès la vni an vizite La Rényon, son shoviy byin gonflé, épi, mi koné pa si èl la fé éksopré, si in bann Droite la may ali dann pyèz "a l’insi d’son plin gré", mé èl la zis déklansh in batay ranzé déssi tram-trin, épi lé z’ot z’idé la pass par d’sou la tab, la près pa anparlé, é kan la anparlé, la malparlé… konm mové l’avoka i fé, souvan-dé foi.
Pars èl i kroi pa program-la... pars son l’intéré, é l’intéré son bann, lé pa la-dan, mé konm in pé noré di, dann lo rézime post-kolonyal... Méssyé lo prézidan, mi félisite pa ou an avoir shoizi in moun konm sa. I fé pa in n’afèr konm sa... I mète pa lo shate pou vèy sosis.

Justin


Kanalreunion.com