Oté

In vré koshmar pou l’imanité !

Justin / 15 octob 2014

Matant Zélida la ékrir Justin :Mon shèr nové, mon spès salté, rouj-de-fon dovan l’éternité,Si mi konpran bien, zot i sort artrouv z’ot z’ènmi natirèl, l’amérik é konm lo shien kan nana in zo pou sisé, zot i sava tir la dsi ziska k’in zour nora pi lo gou. mèm si, pou sa, zot lé dann l’obligasyon donn bondyé san konfésyon désèrtin diktatèr, sansa désèrtin péi i trèt bann droi dé l’om par dsi la zanm. Mèm si, konm dann lo bon tan, zot lé oblijé di l’erop i zoué konm in pti konplis bann z’amérikin san obliy tout lo rol l’amérik la tienbo pou défann lo monn lib. Somenn dèrnyèr, moin la antann in zournalis apré di dann télé, afors son zorèy téi sif pars li té apré antann in shaplé kritikasyon kont l’Amérik. lo boug la di : « Mi vé bien l’amérik lé résponsab pou tout sak i ariv dsi la tèr, mé kant mèm i fo pa égzazéré é sirtou i fo pa déform la vérité ». Tok ! Pran sa pou toi !Justin la fé pou répons :Mon vyé matant k’i koz touzour la boush rouvèr,Rasir aou, ni donn pa pèrsone bondyé san konfésyon é sirtou ni partaz pa lo mond an dé koté : in koté bon, in koté méshan. Ni koné osi, bann gran péi i défann zot pozisyon é la plipar di tan sé bann ti péi k’i siport la kass. Sa lé vré pou l’éshofman klimatik, sa lé vré pou la sékirité, sa lé vré galman pou bann droi élémantèr. Ni koné k’o plis v’alé, oplis kat — sink gran péi va domine lo mond é sar pa pou lo bienn l’imanité. Mao té i apèl sa lo shovinism bann gran nasyon é plis v’alé, plis sar konmsa vi ké bann mouvman révolisyonèr lé fine afébli.. Mé, konm di lo kont : « Tardra. Viendra ! » L’Amérik sé ankor promyé puisans militèr nana dsi la tèr é pou gard son pozisyon li lé kapab mète son bann zanbèk partou. Mi di pa ousa, mé partou sé partou. Mé, sa i korij pa li, li l’apré aplik son tik-tak partou, dann tout kontinan : « Mète dézord é apré fé pass ali konm in sovèr ! » é étone pa si lé zot i fé parèy ziska ké lo mond lé pi kontrolé ditou, par pèrsone. L’èr-la lé riskab ète in koshmar pou l’imanité. Tok ! Pran sa pou ou !NB. In kozman pou la rout. "Bilinbi la di : Mang karote lé èg !". Bann fransé i di osi : i oi la paye dann z’èy son voizin i oi pa pyès do boi dan la syène. Sa i vé dir ou i fé roprosh lé zot san oir ou lé pa lo pli blan é lo pli pur ké nana. Sa lé konmsa dan la vi ! konbien foi ou i antann apré krétik inn, krétik l’ot konm si ou na poin défo !.. Konm Zézikri téi di pou in fanm la tronp son mari : « Sak la poin péshé i donn promyé kou d’galé ! ». I paré pèrsone la pa donn lo promyé koud ’rosh, la pa lapide lo fanm. Mi di azot sa pou fé travay zot koko, pou fé bouy zot matyèr griz. kroi amoin sa i pé ansèrv kékshoz !


Kanalreunion.com