Oté

In vré sanksyon sansa in fé sanblan ? Ni atann pou oir !

Justin / 3 zwin 2011

Matant Zélida la ékrir Justin :
Mon shèr nové, mon spès salté,
Mi domann amoin bien pou kosa zot lé an sansitiv konmsa. Akoz zot lé si tan tèlman siséptib ? Dizon zèrb i apèl tronp la mor. Ou la pankor aprosh out doi, ala ké li rakokiy déssi li-mèm. Alors koméla, tout sak i fé, tout sak i di, zot i san zot lé vizé : in tishèrt i plé pa zot pars i di déssèrtin Kréol lé in pé parès, in l’afish dann la zandarmri i fé sort azot zot gon. Mèm in kozman pou fé ri la boush i mète azot an rogn. Mi pans, zot doi an avoir dé shoz pou arprosh azot, inn foi ké zot lé paré pou aboyé ; Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Défoi, mi domann amoin si ou i pans vréman sak ou i di, sansa si par définisyon pou ou, bann moun i sort fé romark azot sé tan issi-la na touzour rézon di sak zot i di, fé sak zot i fé. Pars, mon vyé matant, kan i mète déssi in linj bann Kréol lé parès, mi pans pa in sèl Kréol i pé ète kontan pou in n’afèr konmsa, pars ni koné nout zansète dann kèl traka la pasé, koman zot la mèt lo péi an valèr mèm dann danzé. Zordi ankor, kisa la fé gran rout Tamarin si la pa bann Rényoné, kisa lé apré fini lo baskilmann lo si la pa nout Nasyon ? Parès pou d’ot la pa pou nout zansète, la pa pou nou non pli... Skiz mon pardon, mé mi fé romark aou dann lo ka l’afish rasis dann la zandarmri Bras-Panon, mèm bann z’otorité lété pa kontan pou in foi ; A savoir éstèr si zot i kontant ar pa zot avèk dé-troi parol solman, plito k’in bon sanksyon ; Pars nou la fine vi z’afèr konmsa. Donkalor, ni atann pou oir !

Justin


Kanalreunion.com