Oté

In z’atou, sansa in zanbèk ?

Justin / 20 zanvié 2016

Na poin lontan mésyé Zipé, in dalon mésyé Tyéri Robert, la vni La Rényon pars lo boug l’apré fé son kanpagn : i apèl sa lo primèr, pars sa i port dsi lo shoisisman d’in kandida pou la prézidans la répiblik. Dann parti d’la droite Zipé lé kandida pou lo kandidatir. Bof ! Ni sa pa fé in fromaz èk sa !

Mé sak moin la antann sé lo boug apré dir La Rényon sé in z’atou pou la frans : in z’atou sé lo pli for kart kisoi dann bélote, kisoi dann d’ot zé ankor. Anfin, ala nout péi in z’atou pou La Frans : ni pé diskite in bonpé la dsi mé sak lé sir sé ké La frans nana pou gagné avèk nou : kisoi pou son domenn maritime, kisoi ankor dann son domenn militèr - nou sé in santnèl avansé dann l’oséan, kisoi ankor pou tranp son kiyèr dann marmite i bouy pa pou li-fasonn parlé ! O sinonsa pou ansèrv sipèr-marshé pou son bann prodiksyon.

Mé na in dalon la di amoin konmsa : La Rényon sé in z’atou pou La frans ! Akoz pa in z’atou pou li mèm é par li mèm ? Akoz sèrv marsh pyé pou lé z’ot olèrk an profite son sityasion pou mète ali an l’èr. Na pou diskité la dsi é lé pa sèryé lans inn-dé mo solman san anparl la shoz o fon. Pars késtyonn mo nana osi zanbèk dann la lang kréol-zanbèk sé kal ! Pars tazantan moin lé apré domandé si La frans sé in z’atou pou nou sansa in zanbèk. L’inn konm l’ot, mon zénéral.


Kanalreunion.com