Oté

Inivèrsité La Rényon : lo sindrome gouyav de Frans la frap ankor in kou !

Justin / 24 mé 2016

Ni dira zamé asé ké Sudel Fuma té in gran bonom, in gran rényoné, inn an parmi nout méyèr l’istorien. Mi sava pa di tout sak li la fé pou fé konète nout pasé - donk nout prézan an mèm tan épi nout domin… Mé oila na in bon koup de tan Sudel lé mor é l’inivèrsité la désid mète in n’ot moun pou okip lo mèm post ké li.

Bien sir nana bann bon kandida pou sèy ranplas Sudel isi la Rényon. Bien antandi nana osi d’moun étranj k’i san z’ot kor pou ranplas ali. Kisa lé pli kapab ? Mi koné pa. Kisa sé lo pli konpétan ? Mi koné pa non pli. Mé moin la fine dir, é pa moin tousèl, kan nana kandida valab i si shé nou, sé isi k’i fo shoizir. Konm di lo kont, nou la pa z’anfan batar é ni pé travaye bien konm k’i fo pou nout péi nou osi pourvi ké ni done san-pour-san pou nout péi.

La prèv ké nana in sistèm ké lé pa bon sé nout klasman an parmi bann z’inivèrsité fransèz. In foi an plis la mète anou avan-avan dèrnyé. Na zis dé lé déyèr nou dsi 77. Zot i pans pa ké lo rékritman l’inivèrsité sré pou kékshoz la-dan ? Alors, pou kosa alé rod déor sak i égzis isi. Pou kosa alé rod in moun i sort Nantes pou ranplas in gran rényoné… Konm i di : lo sindrome gouyav de frans la frap ankor in kou.


Kanalreunion.com