Oté

Inn-dé nouvèl dsi mouch a myèl

Justin / 13 out 2016

Konm i di zordi nana lo myèl dann la kanpagn épi nana lo myèl dan la vil. Oplis i sava oplis bann mouch a myèl i trouv lé myé pou zot vnir an vil pou instal azot. Pars dann la kanpagn nana tro produi shimik é anplis ké sa la monokiltir i tyé la bio-divèrsité é sa sé in n’afèr mouch a myèl la bézoin.

Moush amyèl dési konsèy réjyonal Montpellier

Mi pans moin la fine fé in modékri la dsi dann nout zournal témoignages. Mi souvien, moi lété dann péi déor é l’avé in zourné port-ouvèrt pou vizit lo bann rush. Sa sé in n’afèr la bien intérès amoin, sirtou ké apré la vizite l’apèl bann vizitèr pou gout lo myèl é si mi rapèl bien lo myèl té bien bon. Donk moin la pans ké sé in bone idé é sirtou in l’idé itil pars sa i prézèrv la bio-divèrsité.

Moush a myèl santinèl pou gardien la bio-divèrsité

I paré moush a myèl sa lé dsi la tèr dopi katrovin milyonn z’ané par la. Lé san konparézon avèk lo l’ansyènté l’om modèrn-san mil z’ané par la !- An pliské sa sé zot k’i bitine katrovin pour san bann flèr donk sé zot k’i prézèrv la byodivèrsité é an pliské sa, sé par zot ké nou nana manzé dsi la tèr. Na in savan té i apèl Einstein té i di konmsa, kan lo dèrnyé moush a myèl sra mor va rès l’imanité kat z’ané pou viv. A moins k’i sava trouv ankor in métod artifisyèl pou ranplas la métod natirèl bann z’abèye.

In kontra pou instal bann rush dann la komine Le Port

Mi koné pa si zot i ansouvien mé nout zournal la anparl de sa : la komine la sign in n’akor avèk bann moun té i vé élèv moush amyèl dann Port. Pou moin pèrsonèl sa té in n’afèr inportan touzour pou la késtyonnn la bio-divèrsité é osi pou amontr dann tan-la té in minisipalité bien réspéktyèz pou la natir. I fo pa obliy Le Port avan té sèk vèy pa koman é ziska tan ké la plant sink san mil pyé d’boi é i fo dir la komine lé bien vèr. Arzout ankor èk sa dann la vil lo Port na plis pyé koko ké partou dann La Rényon.

In apèl pou instal bann rush dan la foré

Moin la lir dann zournal na dé troi zour, konsèy départmantal épi l’ONF la lans in apèl a projé pou sak i vé instal bann rush dann la foré. I fo dir sé in bone i dé pars la-ba la poin tousa produi shimij é solon lé ka nana bonpé flèr tout kalité. Sa sré bon pou bann z’abèy konm pou bann z’élvèr moush é pou La natir La Rényon. Sa i ranplas pa in plan pou défann la bio-divèrsité an zénéral mé sa lé pa mal kant mèm.


Kanalreunion.com