Oté

Inn-dé nouvèl la somenn la somenn i sort pasé

Justin / 9 zwiyé 2016

Ankor in nouvèl l’anglétèr

Nana trézan la Grann Brotagn la désid suiv l’Amérik dann son l’agrésyon kont l’Irak. Dann tan-la mésyé Blair, in dirizan la gôsh dann lo péi, lété promyé minis é li la désid suiv l’Amérik, pou, d’apré sak zot téi di, détrui bann z’arm déstriksyon masiv. Ni koné té pa vré ! L’avé poin lo z’arm déstriksyon masiv dann l’Irak ! Ni koné osi kan zot la fé sa, zot la rouv la port l’anfèr avèk Al – Quaîda, épizapré l’EI. Final de kont zot la fout in dézord dann lo péi é ziska zordi la pankor répar sa. Mésyé Blair lé koupab, li domann éskiz, pou tout bann mor é blésé, mé li di si lété pou rofèr li nora rofé. Sa na toupé so boug-la ! in boug la mète ali o sèrvis bann gro kapitalis épi bann z’inpéryalis amérikin-in moun la gôsh poitan !

In shèrchèr shinoi la trouv lo vèr pou détrui désèrtin plastik

In lékip shèrchèr shinoi la trouv in vèr lé kapab détrui bann plastik. Sak zot la trouvé lé intérésan vi ké konm zot i koné lo plastik i polyié la tèr, la mèr, la natir an zénéral. Moin pèrsonèlman, mi pans kan la romarké lo mond téi sar ète an danzé avèk in plastik i mète 400 z’ané é mèm plis avan li dékonpoz, té i falé défann fabrik in n’afèr konmsa plito ké lès ali gate la natiir konm li la gaté. Lé vré k’i sort intèrdi bann sasé an plastik mé mi trouv zot la mète lo tan . In romark : La Frans, péi la ébèrj la konférans mondyal dsi l’anvironeman l’ané 2015, na in pé plis in an an rotar par raport Maurice-shapo pou lo péi dé limyèr !

L’euro d’ fotball : Nana dé l’ékip la fine kit l’Euro d’fotbal é moin la vi azot alé avèk rogré . Pou kosa ? Pars souvan dé foi mi pran parti pou lo pti kont lo gro. Pou kosa ankor ? Pars lo bann fotbalèr bann gran péi i roul azot dann l’arzan konm koshon i roul dans la bou. é i défann z’ot roiyom pou gard sa pou zot tousèl. mé na dé foi inn-dé péi pli pti, moin rish i amontr osi z’ot gouté ; Donk sé lo péi d’Galles épi l’Island : zot la parti é lé bien domaz. Mi an pé arien la-dan, mé mi majine lo zour kant in pti lékip va fout in batlavé in gran l’ékip ; Zour-la, si mi viv ankor ma anroul amoin dann son drapo ; Fransh vérité !

Nana dé l’im nasyonal lé vayan oui vou z’ot !

Zistoman l’im péi d’Galles : in péi otonom é pa indépandan. Mi pé dir azot kan plizyèr dizène do milyé d’moun i shant z’ot l’im ébin sa i fé aou kékshoz dann fon out kèr . Konm kan Nolween Leroy la shant l’im breton dann éstad dé Frans. L’èr-la mi rèv in l’im rényoné kapab antrinn nout pèp dann la rovandikasyon. Mi rèv ? Bien sir mé in zour in rèv i dovien in réalité é zour-la sé lo pli bo zour dann la vi pou in bonpé. alor, bann mizisien épi bann rényoné patriyot, alé konpozé, alé fé pou nou in l’im rényoné konm k’i fo ;


Kanalreunion.com