Oté

Inn-dé nouvèl moin la aprann somenn isi

Justin / 17 séptanm 2016

La kantine L’étan-salé

Mi antann dann radio fridome tout in wati-watia dsi la kantine l’étabn-salé. Mi konpran bien, konm in pé partou, nana bann bon péyèr é nana bann mové péyèr é nana osi bann ti-shèf rodrésèr d’tor, i tiliz in pé z’ot pti pouvoir. Sa la touzour été konmsa dopi ké lo mond i égzis. Moin na in dalon, in frèr la rapèl amoin kozman-la : « Manzé kui na poin propriyétèr ! ». Mé zistoman dann la kantine nana in propriyétèr sé lo bann marmaye k’i manz la kantine… inn foi ké lo bann paran i pèye. Lo sèrvis kantine lé la solman pou roganiz manzé marmaye i sava l’ékol. Dizon li lé zéstyonèr dann in sèrvis piblik é li la pa la pou égzèrs, n’inport ékèl fason son pti pouvoir par désèrtin z’abi d’pouvoir. Final de kont, mi ans avèk la diskisyon in problèm konmsa n’oré pa débord dann l’opinion piblik.

Répiblik Sésèl : l’opozisyon i gingn zéléksyon dépité

Moi d’désanm l’ané dèrnyèr James Michel la gingn pou lo troizyèm foi lo zéléksyon prézidansyèl. Solman so foi isi la mazorité lété pa si for ké sa : i pé i di lo rézilta lété rik-rak, sinkant avèk dé pousyèr, kont karant-nèf épi in pti pé. Moi d’séktanm la fé z’éléksyon dépité é so kou isi sé lo parti l’opozisyon ké la gagné-15 séktanm moin l’aprann rézilta : l’opozisyon la gingn 15 syèz dépité é Lepep la gingn dis. Lepep, sé lo parti i diriz lo péi dopi 1977. La-ba, la pa in sistèm konm La Frans, sré plito in sistèm konm l’amérik pars lo prézidan lé shèf dé l’éta, épi shèf lo gouvèrnman donk lé dé – lo prézidan é la shanm dépité-sar blijé gouvèrn lo péi inn sanm l’ot. I paré, d’apré sak moin la lir, sé sak zot i vé fé dann l’intéré lo péi. Ni souète bone shans nout bann kouzin séséloi.

Problèm la fain dann sid Madagascar

D’apré sak moin la lir é bann nouvèl moin la antann dann radyo lo problèm la fain i tap ankor for dann sid Madagaskar. Par-la in milyonn moun i manz pa pou ranpli z’ot vant é shak ané lé konmsa é lé pa paré pou fini pars solon sak moin la lir shak ané lé konmsa. Pa si tèlman dann bann vil, mé dann sak i apèl La Brous . Poitan l’androi-la lé pa kondané pou konète in sityasyon konmsa shak ané pars koméla nana métod é nana somans pou vanj kont la fain. Mi arète tèr-la pou zordi mé mi pans nou va ar-oir so problèm-la.

Alé, bon samdimansh konm mon dalon Daniel Honoré i di é ni rotrouv pli d’van !


Kanalreunion.com