Oté

Inn-dé nouvèl moin la lir d’isi d’la-ba

Justin / 6 out 2016

In doz réprézantasyon proporsynèl dann l’il Maurice épi Rodrigues ? Mésyé Anerood Jugnauth la anons i pé an avoir in doz roprézantasyon proporsyonèl dann l’asanblé nasyonal. Sa lé vré galman dann z’éléksyon pou ronouvèl l’asanblé l’il Rodrigues – pou z’éléksyon moi d’ févriyé 2017 dann Rodrigues... Ziska zordi la-ba dann Maurice nana in z’éléksyon mazoritèr in sèl tour : sak nana la mazorité d’voi i gingn lo zéléksyon. Lé shoz i sava pétète shanjé

La fyèv aftèz dann l’il Rodrigues : Fyèv – la, la trap bann z’animo l’il Rodrigues dopi in koup de tan déza. Zournal Le Mauricien i anons plis san z’animo la fine mor avèk maladi-la. Bann z’animo anbarké dann bato pou l’abatoir dann l’il Maurice sar an karantène ziskatan k’i romark zot lapi malad. Lo shèf vétérinèr la domann la min tout bann l’élvèr pou ède ali épi éde azot pou vanj kont so maladi viral-la pars lé pa fasil soign la fyèv aftèz dann in troupo z’animo. L’asanblé Rodrigues la réini vantredi apré-mi di pou désid in plan pou konbate la maladi. Késtyon ? Maladi i ariv Rodrigues, i pé ariv galman Maurice é la Rényon dann tousa-la ?

Serge clair lé kontan pou lo bidzé : Serge Clair shèf komisèr l’il Rodrigues i di li lé bien kontan pars gouvèrnman Maurice la tienbo kont son domann dann bidjé 2016-2017. Zot i koné Rodrigues sé in péi autonome dann la répiblik Maurice ! In n’ot nouvèl l’il Rodrigues : nana in projé pou agrandi la pist l’aviyon pars sète zordi la pa asé gran pou bann l’aviyon gro-portèr pozé dann la sékitité .

In rézo la prostitisyon marmaye kolèj dann l’il Rodrigues : La polis Port Mathurin i sort débisk in rézo la prostitisyon bann jenn fiy minèr dann l’il Rodrigues. Banna la kal in shofèr taksi morisien é so l’aréstasyon la pèrmète azot trouv lo rézo la prostitisyon. In jenn fiy 17 an k’i frékant lo kolèz la di èl té i loué son kor pou san roupi l’il Maurice (2 éro édmi !) la d’ot pèrsone adilt. Son téléfone portab la pèrmète galman trouv d’ot jenn fiy k’i fé lo mèm komèrs k’èl. Désèrtin z’adilt i done kado pou bénéfisyé bann drol préstasyon-la.

In dèrnyé nouvèl Rodrigues : Rodrigues la fé in plan pou vni in il bio mé nana si tèlmann z’afèr la-dan ké noiu va prann in tan pou koz dé sa.


Kanalreunion.com