Oté

Inn-dé nouvèl moin la lir, somenn isi, dann zournal

Justin / 1 octob 2016

Lo prézidan sésèl i démisyone :

Moin la fine dir azot lo prézidan James Michel l’été élu moi d’désanm l’ané dèrnyèr, mé kan la ronouvèl lo bann dépité, so kou isi, moi d’séktanm 2016, sé lo parti l’opozisyon-l’inion démokratik séséloi - la gingn la mazorité. Moin l’avé lir osi la-ba banna l’été parti pou in sort ko-zéstyon lé z’afèr lo péi pars lo prézidan nana pa mal de pouvoir é bann dépité nana sète zot galman. Lo prézidan l’été pa blijé démisyoné mé li la fé é sé lo vis-prézidan, Danny Faure, i ranplas ali pou ziska la fin d’lo manda. Alon éspéré lo péi va kontinyé marsh dann shomin dévlopman é bann politicien la-ba lé pli intélizan ké sète isi. Espéron !

La fyèv z’animo i kontinyé ravaz bann troupo l’il Moris épi l’il Rodrig.

Moin la fine dir azot la fyèv aphtèz l’apré fatig bann troupo dann l’il Rodrig épi dann l’il Moris. Dann in promyé étap la fé vni bann vaksin i sort l’afrik mé bann vaksin-la la pa marsh konm bann z’élvèr té i atann. Pou anshévé, d’apré sak i di bann sèrvis vétérinèr la pa marsh konm té i fo si tèlman ké la maladi la dévlop in kantité é in bonpé z’élvèr la pèrd z’ot kapital dan sète afèr. Avan yèr soir dann télé isi La Rényon, la amontr l’abataz bann bèf : l’été in rash kèr in n’afèr konmsa… Moin la pa antann parl la kopérasyon dann la COI pou done la min inn-a-l’ot, konm de koi la COI, sanm pou moin, i zoué pa vréman lo rol k’i riovien ali si ni vé in bon kopérasyon rantre nou mé nou n’ora l’okazyon pou anparl de sa pli d’van.

Brachoua : In vilaz la sort dann la mizèr par la pèrmakultur.

Brachoua sé in vilaz dann lo péi i apèl Marok, pa tro loin la kapital Rabat. Dann vilaz-la lo moun té fatigé avèk la privasyonn manzé ; si tèlman k’in zour dan l’ané 2013 si mi tronp pa lo moun la désid asosyé pou produi sak zot la bézoin pou manjé san produi shimik avèk lo pti pé d’lo ké zot l’avé.. Zot la shoizi pratik la pèrmakiltir é sistèm-la té bon pou zot. Dann tan l’avé in sèl zardin mé zordi nana plis 40 avèk in bon rannman. Si tèlman ké zot la gingn do koi pou manzé é an vandan zot la gingn shakinn in pti pékil l’arzan. Aprésa, zot la vann z’ot panyé légime, volaye étout sort z’afèr, bann vilaz lé z’alanour. koméla zot i roganiz bann vizit tourist Zordi zot la pi bézoin ésplinn avèk bann z’otorité, vi ké zot i kont dsi zot an promyé pou ansart azo épi zot i kont pi dsi baton tonton pou travèrs la rivyèr. In bon l’égzanp a suiv !


Kanalreunion.com