Oté

Inn-dé nouvèl sak i éspas dann lo mond

Justin / 2 zwiyé 2016

La Frans : san pou san l’éléstrisité vèr pou gingn près kat poin dann la PIB

Rézilta-la i port dsi in kalkil l’ADEM la fé, pou 2050, dann lo ka in tranzisyon dann l’énèrzi par raport sak i fé koméla. Près kat poin pou lo PIB si Lo péi i fé konm li la di son tranzisyon énèrzétik. In kou d’rès trankil pou tout sak i vé pa bouz lo sistèm é kotinyé a baz dsi lo l’énèrzi nikléèr, lo pétrol, lo gaz épi tout so bann téknik i polyé plis k’i an fo l’anvironeman.

Astèr si ni kalkil in miks pou La Rényon avèk la mèr, lo van, lo volkan épi lo bio-gaz, ni oi nou osi nana pou gagné mé bann lobi l’énèrzi sal non ! In bon léson pou nout l’avnir dann l’otonomi énèzétik. In révolisyon bien nésésèr isi shé nou.

Kèl moush bèf la pik bann gouvèrnman fransé ?

Mi sort lir l’anbasad La frans la-ba dann bannzil komor la rofiz in délégasyon bann sindikalis in viza pou zot alé in kongré bann sindika. La CGT la kondane lo gouvèrnman pou sa. Alé oir bann sindikalis lé bien koni, zot na arien a voir avèk lo térorism In l’érèr sinonsa in politik kalkilé ? L’érèr lé imène mé apré tousa vilin manyèr gouvèrnman La frans la fé avèk bann komor mi pansh plito pou in nouvo provokasyon. Kèl moush bèf la pik banna ? Sirtou ké nou ni konpran bien sa i ral déyèr lo ko-dévlopman rant bann pèp nout réjyon.

Zistis makro ?

Momandoné té i oi in bonpé l’ékritir-la dsi bann mir La Rényon. Mé a s’ki paré i f opa parl konmsa pars lé pa bien fé in komantèr dsi in ziszman. Mé zordi mi pans dé shoz : inn bann anvoyèr d’alèrt, sak i signal tout bann z’abu désèrtin gouvèrnman avèk z’ot sèrvis sogré i komète é bin tribinal la kondane azot pou bien fé konprann bann gouvèrnman na lo droi abizé. Dézyèm z’afèr sé lo traka banna i fé bann Chagossien : dèrnyé ka dovan la kour siprème l’anglétèr. I di pa zot na tor, mé i di gouvèrnman z’anglé l’apré aranz lé shoz alor bouj pa, an atandan.

Huityèm mor dann la bann l’ARAST

Toulmoun isi La Rényon i koné kosa l’ariv bann l’arast. Moin pèrsonèl moin lé pa pou zot san pour san, mé mi trouv sé in éskansdal la manyèr la rofiz pèy azot z’ot z’indamnité konm k’ i fo é l’èr k’i fo épi la fason la zoué ping-pong èk zot. Dopi so tan-la, sa i fé uityèm pèrsone i mor avan trap z’ot l’az normal pou mor. I pé dir la pa la fot konsèy zénéral, la pa la fote l’asédik, mé banna la pa robo é la doulèr i fé mal. Moin mi dout pa ké so uityèm mortalité nana kékshoz a oir avèk lo arsèlman z’ot la sibi.


Kanalreunion.com