Oté

Inn-dé nouvèl, sak la spasé somenn isi par-si, par-la

Justin / 3 séptanm 2016

Zéléksyon prézidansyèl dann Gabon :

Mi pans zot i koné lo Gabon. Sa in péi l’afrik par koté l’oséan atlantik. Sa la pa in gran péi pou vréman é son popilasyon lé pa tro nonbré : 1726000 persone pou 267000 km². Pou z’éléksyon-la bann gaboné l’avé lo shoi rant dé pèrsone : fransh vérité lé dé la pa tro rokomandab é i paré sa dé bo-frèr donk bann z’éléktèr l’avé lo shoi rant la pèst épi lo koléra. D’apré sak i di inn konm l’ot la anprofite lo péi konm zot téi vé pars lo péi nana in kantité pétrol, manganèse d’ot ankor plis in gran foré avèk kantité ptyé d’boi. Ali Bongo lé prézidan é mésyé Ping pandan lontan li té lo promyé minis.

Pli pir ankor lo péi lé mayé dann sistèm néokolonyalis La Frans é lo profitèr istorik sé kant mèm La Frans (mé nou va rovoir sa plis an détaye). Bongo lété déklaré élu, mèm si pou bann z’obsèrvatèr sé lo kontrèr… Dann Libreville, bataye i pète in pé partou, kantité d’moun té arété. Ankor in kou la guèr sivil, ankor in kou malèr dsi la tète in pèp afrikin.

Dé poul i kouv pa dann mèm ni.

Sa in kozman zot té i pé lir dann Témoignages dann la kronik « In kozman pou la rout ». Dé pèrsone dann mèm kaz pou fé la mèm shoz é inn konm l’ot i pans zot sé lo shèf, sa sé in n’afèr i tienbo pa la rout. Mésyé Hollande in malin an parmi bann malin, in rizé an parmi bann rizé té i doi bien konète in n’afèr konmsa mé sa la pa anpèsh ali mète inn é l’ot dann mèm ni. Lé shoz la pa tardé : inn la donn son démisyon madam Pau-Langevin, l’ot la sort dsi ti shèz pou asir dsi fotèy madam Bareigts. Zot i domann amoin si moin lé kontan, Ni kontan ni pa pars dan uit moi nou va oir-sanma pou moin - sé in shanjman pou la po d’patat. Fransh vérité !

Banna i pous loin lo boushon kant mèm !

Zot i koné na in somenn l’ariv in nouvo l’aksidan : in jenn étidyan lété ataké par in rokin. Rozman pou li la gingn sov son vi mé kant mèm sar bliz poz ali inn-dé protèz. Pou kèl rézon, I pare l’avé in bèl trou dann file kont rokin. I fo port in plint : sa lé sir, mé kont ki ?Kont sak la poz lo filé ? Kont sak la pa bien sirvèy lo filé ? Non, désèrtin komèrsan la désid port plint kont lo l’étidyan. La in pé i pous lo boushon in pé loin !


Kanalreunion.com