Oté

Inn-dé nouvèl somenn isi

Justin / 8 octob 2016

Salmonèl dann l’il Moris :

Zot i rapèl l’il moris la konéte na poin lontanla fyèv aftèz é sa la bien an-nuir azot. I diré la maladi la dékline in pé sé tan isi épi lovaksinasyon la marsh in pé konm k’i fo. Antansyon, isi La Rényon, vaksine zanimo kont la fyèv lé défandi, mé Moris sa lé posib. Donk mi éspèr sé in traka an moins pou zot. Mé oila ké so kou isi ala pa ké lo zèf poul épi la vyann volaye la gingn salmonéloz é sa lé pa bon non pli. Lé pa bon pars si nana vréamn é ou i manz out vant li, oput l’éstoma-li lé bon pou roprosh aou. Pli pir, kan la maladi lé fini ala ké demoun i vé pimanz do-zèf pandan lontan. Sé dir out mank-a-gagné. Lo minis la di lo z’afèr lé bon, mé demoun i kroi pa li ; an misoukant in pé i di : si lé bon ou na ka manz par ou-mèm ! Si ou la pa krévé, nou va oir apré.L vi sé sa, La Rényon konm l’il Moris. Béya ! Bondyé !

Moris la-ba nana in n’afèr l’apré jigil bann politik :

Kosa i lé solon zot ? I pare lopromyé minis l’apré rod mat in mazigador pou li fé ranplas ali par son garson Pravind é sé l’èr lo bann parti l épa dakor. Nou la fé vote pou SAJ, nou a pa fé vote pou Pravind. SAJ I avans Dousman-dousman ! I aprann pa vyé sinz pouf é la grimas ! Pmsd I di la pa sa ni vé ! Lalite i ardi la mèm shoz ! Parti travayis lé pa loinn pans konmsa. Béranzé i di alon mète balon o sant ! Alon arfé zéléksyon ! Anfin, konm lo séga i di, sétaki dsi la tèr koné son mizèr. Sétaki i koné son poinn-vizé, son shomin galizé sansa non. Nou va oir la suit !

Dé santyème anivèrsèr Rémy Ollier.

Rémy Ollier lé né l’ané 1816, lo sis oktob, é li lé mor l’ané 1845. Demoun Moris i koné ali pou in zournalis la pran a défans bann moun-koulèr. Morsis la-ba nana in moniman pou li é mèm ké li la pa viv lontan -zis 28 z’ané- demoun la klas moiyène i koné ali konm in moun la vréman vanzé po l’égalité bann z’ansien zésklav. Li lété in oratèr romarkab é sa plime osi té in plime pou konbate : konm li té i di li mèm in fouète avèk mil bransh. I parétré li lé mor anpoizoné mé ziska zordi bonpé morisien nana in bon souvnir so gran bononm-la. Lo sis oktob banna la fé in sérémoni pou son onèr.


Kanalreunion.com