Oté

Inn-dé novèl somenn isi

Justin / 20 out 2016

In liv, in sèl fraz, in pé plis li téi gingn parant an Frans

Li lé komorien éli na vinn-sète an. Li lé galman ékrivin é lo liv li sort ékrir la pa banal ditou : 352 paz é in sèl fraz dopi lo komans man ziska la fin. Konm li ékri an fransé, li la désid vnir pou prézant son liv dann péi Molières. Mé alé savoir pou kosa, gouvèrnman té i vé pa fé donn a li in viza é olèrk rant dan La frans, in pé plis téi ranvoye ali son péi. Pou kosa ? Li sré danzéré pou lo péi ? I fo dir, lir in fraz san arêté si lo fraz nana 352 paz lé pétète danzéré pou la sékirité d’lo péi. Mé konm demoun té riskab rir d’in n’afèr konmsa La Frans la désid donn ali son visa. Son nom ? Ali zamir. Son l’az ? Vinn sète an. Sa in moun danzéré sa !

Bann bonb somans pou arplant la foré

La-ba dann La Thaïlande la foré i disparète o firamézir k’i koup bann pyé d’boi pou l’ésportasyon sansa sinploman pou kui manzé. Lo péi la désid ansèrv kékshoz i égzis dopi lontan : bann bomb somans. I mète lo bann somans dann bann boul la tèr, konpos é tout sa lé bio-dégradab. Koman i fé ? i mète tousa la dann l’aviyon épi i larg sa dann l’androi la foré lé dévasté. In sèl l’aviyon i larg san mil grin pyé dboi é la-dan nana 70 pour san i pous. In bon solisyon pou roboiz la foré in pé tro abimé in pé partou. Bann bonb somans in bon solisyon pou roboiz bann péi. Mé nana d’ot solisyon pli tèr-a-tèr la pa bézoin ansèrv l’aviyon.

Anne Musso lo promyé moun lé éné dan nout péi

El lé né lo moi d’oktob 1668. Son papa lété k’i apèl Jean Musso é son momon Marie Cazo. Anne Musso sé lo promyé moun lé éné dann nout péi. Zordi mi ékri sa, sa i déranj pa pèrsone aparaman, in malgashine lété lo promyé zanfan La Rényon, mé nana in pé d’tan, kan in pé téi vé absoliman ké nout bann z’ansète té i sort l’erop sa té kapab fé in éskandal si tèlman in pé na dmoun l’éspri lé pa tro rouvèr.


Kanalreunion.com