Oté

Inn zanr d’gadzèt !

Justin / 13 févrié 2016

Si néna inn anparmi, lèrk ki lé, i nyabou donn a mwin in bon lésplikasyon d’si lo légalité réèl, li riskab gingn in mèrl blan aprésa. Ala i sort nonm in ot gouvérnman, néna i moukat, néna i di, “gouvérnman finn drwa“, néna i di “dérnié vèr pou la rout“ ousinonsa “o lièk avans dovan i rokil déryèr“k onm si ni pé kont d’si lo dwa la min sak i krwa ankor tousala, néna konm Esau, la vann zot drwa d’énèss pou in pla lantyi. Sanm pou mwin tousala i rann pa sérviss pou vréman la politik.

Alorss mi an rovyin d’si lo légalité réèl. So matin, in dalon i domann a mwin si mwin la antandi la nouvèl. Déza kèl nouvèl ? Dopi yèr lo nouvo gouvérnman lé an plass é la nouvèl sék néna inn dépité la Rényon i tonm an parmi. Madam Bareigts i dovyin sécrétèr d’éta sharzé dé l’égalité réèl. Radio, konm télé, konm zournal la fé koz a li. Kosa ? Ou tonm sécrétèr d’éta pou nou éspésyalman, vik nou lé pa égal-égal èk déor ? La di pa ditou, li di, mi tonm sécrétèr d’éta pou tout la franss.

Mon dalon i arvyin. Sé koué lo légalité réèl boudikont ? Koman ou vé mi réponn a ou la d’si vik mwin minm mi konpran pa. Mwin minm mi miz pa tro la d’si, an plis i di sé pou dan vin t’an, out zo na lo tan blanshi an atandan. Pason d’si lo légalité réèl, sanm pou mwin li lé konm lo mèrl blan. Dawar té falé trouv in nafèr i sonn byin, pou amiz la galri, pou fé bav a nou, in zanr d’gadzèt si oui vé.


Kanalreunion.com