Oté

Insivilité ! Sé koué lo « insivilité » ?

Témoignages.re / 14 zanvié 2014

Nou koné pi koman nou sar giny fé arèt domoun dépoz tout zot salté ninport ou, ninport koman !
Pourtan, mi mazine dan tout komine, nou doi giny in kalandrié dan nout boit a lèt, débi dané konm la na dé troi zour d sa:ou na lo ankonbran, tout sort masine, lo désé ver sétadir bann brans ou vé débarasé sirtou aprè siklone konm ni viinn viv.

Mé bayoun, mi romark, tout désé i zinn a toué ton kaz , o lié zèt dan ton poubèl, ti viin zèt si mon térin, a moin i ramas ton salté astèr ? Na kéksoz pa normal mé alor pa normal ditou !
Lo pli grav sé lo bann zanimo mor, lo bann kadav sa i pi o bout dé zour ! Lo mous i komans volé.
Sa lé gayar, ti ranvers lo sak , ladan nana plime poul, la po la pat li la plisé ; baya, lo boug li tié in dizinn poul, li fé son festin, kan li arzout pa in kabri, ek la po, la pat, toute lo zantray li manz pa,sa i grouy ék lo vèr…

Défoi, ziska gro poul antié krévé, dawar nana i fé lélvaz bann volatil par milié… Li koné pa na lékouarisaz ; zanimo i tonm étoufé ! Ou apèl sa in nélvèr ?…i giny pa apèl lékouarisèr va nni èk son kamion eksprè !sé li ki ramas bann désé konm sa !
Lo moun i koné pa ou sinon i fé sak i koné pa…
Si mi trouv in ladrès –par egzanp in biltin d garanti-mi port la Polis, toué va dir justin lé mové !

Koman i fo fé po domoun i arèt dépoz zordir ninport ou ?
Estop in pé ék so bann « insivilité » ; alon viv an moun sivilizé,oté !
Sé in manièr respé ; mi respèkt a ou ; respèkt a moin ; ou lé dan in sosiété, toulmoun i pé pa fé ninport koué ! Si ou pans pa out planèt, pans o moin out zanfan ; édik ali par legzanp, par lo bon zegzanp !

 Justin 


Kanalreunion.com