Itilité piblik, initilité piblik épi danzé piblik

Kan ou i antropran pou fé la route tamarin… monte in prozé tram-train, mète anlèr in mézon pou bann sivilizasyon é pou l’inité rant bann rényoné… kan ou i fé toute sak i fo pou pou mète nout zénès anlèr... nout pèp anlèr… nout péi anlèr... kan ou i domann galman l’otonomi dann l’énèrzi, la sifizans manzé par lo ko-dévlopman… kan ou domann in gran sèrvis l’anvironeman é bann boulo dann la proksimité, i pé dir, san fé in lérèr ou i doi ète déklaré pou l’itilité piblik... L’alyans lé konm sa !
Kan ou lé kont toute sak l’alyans la fine fé yèr, l’apré fé zordi, é i vé fé dan nout demin... ou i intérès pa pou protèz bannzil, épi mèm toute bann kartyé, sak lé plate dan La Rényon… kan ou i vé kass toute bann prozé épi mète dann shomaz in kantité travayèr an plis, i pé di ou i doi z’ète déklaré pou l’initilité piblik. Bann l’iltra-droite lé konm sa !
An plis ké sa, kan ou lé kont la mézon bann sivilizasyon épi l’inité rant bann rényoné, ou i vé pa toute bann kiltir nana in mèm konsidérasyon, ou i vé kashyète lo passé bann rényoné, ou i vé sépar anou avèk toute bann péi nout bann z’ansète... sof l’europ. Lèr-la ou lé pli pir ké l’initilité piblik, ou lé, konm di kréol, in danzé piblik… Madam Coualpèl lé konmsa, èl i doi ète déklaré konm in vré danzé piblik !

Justin

NB – A moins ké konm déssèrtin i di : "iltra droite épi réagir, sé blan-boné, èk boné-blan, topète èk morète", la troup avèk son l’avan-gard.