Oté

Iznogood : Mi vé èt mèr la plas lo mèr !

Justin / 31 zanvié 2012

Gironcel l’ariv promyé, promyé tour z’éléksyon. Konm in bonpé d’moun La Rényon, mi pans, sé kaziman in l’éksploi. Akoz ? Pars dopi plizyèr moi, bann gran zournal lé dési li é dési Parti kominis. Désèrtin radyo i arbat tanbour la dsi ; bann télé i suiv. Normalman, sa na asé pou kapot in l’opignon. Arzout èk sa, Gironcel l’avé kont son list, anplis dé list la droit, dé list avèk dé kandida : inn lé Konsèy zénéral épi promyé adzoin, é demoun té i koné li prépar z’éléksyonn mèr dépi promyé zour Gironcel la démisyone son plas mèr, é li té i fé konmsi li lété mèr, ziska pas kal é pa arienk in foi. L’ot lé mèr, é sa i done ali in pouvoir par rapor bann z’éléktèr.
Donk, alala, sanm pou moin, pou kosa Maurice la gingn in bon rézilta. Konm i di dann rigbi, lo l’ésé lé marké, i arèt pou transformé dimans k’i vien !
Solman, pou transform lo l’ésé, i fo éklèrsi ankor lé shoz. Poukoué ? Pars in bonpé z’éléktèr, an parmi sak la voté, la déklar dann radyo zot na in problèm konsyans. Zot i di, zot i vot pou kandida Parti kominis, mé konm d’apré zot, nana troi, lé difisil pou shoizi. Si la list Maurice, son kanpagn, l’avé gingn bien éklèrsi lé shoz dan l’éspri dmoun, l’èr-la lo rézilta noré pa été parèy. Mèm shoz, désèrtin la di, zot i suiv l’éspri défin Lucet, é moi lé sir sa la fé son l’éfé dsi l’moun.
Par l’fèt, sé kant mèm Maurice la rofiz tra-yi défin Lucet. Mi pans désèrtin nora sot dsi l’okazyon pou pran plas lo mèr ! Mi di pa kisa i lé, mé konm di lo kont, Iznogood, sak té i vé èt kalif la plas lo kalif. Lé fasil oir kisa i lé !

Justin


Kanalreunion.com