Oté

Jatrofa, pignon d’Inn i intérès pa d’moun ? Kroi pa sa !

Justin / 12 zanvié 2015

Nana kék tan-l’ané 2007-, dann nout zournal moin la lir in lartik téi apèl konmsa : « Le jatropha gagne le sud ». Kan té i di « lo sid » té i di « lo sid Madégaskar ». Kan té i di jatropha, té i anparl « pignon d’Inn ». Zot i koné kosa i lé, mi éspèr ! Touléka kan nou té marmay, nou la konète ali. Si ou té i manj son bann ti noi, pa bokou, dizon arienk inn-dé késtyonn kiryozité, mi asir aou ou té apré rod malèr pou out kor.. konm moin la di, na poin lontan ou l’ atèl lo dyab èk out karyol. Dyaré li ! Mal o vant li ! vomisman li ! L’étourdisman li ! féblès ! in famé tablatir té i tonm dsi ou.

Mé par l’fète pou kosa la fé vni in n’afèr konmsa isi. Moin la domann bann z’ansien : in pé la di amoin sé pou mark la borne térin d’moun konm i fé avèk pyé shandèl ! Na d’ot la di amoin sa sé pou fé lyane la vaniy dosi ! moin la trouv minm in moun la di amoin sa sé in médikaman i doi z’ète bien dozé sansa ou va donn boubou out kor ! I paré osi bann zanimo kan té i tonm malad, té i manz in pé pou fé pass zot konstipasyon ! Mi koné pa si lé vré, mi vann konm moin l’ashté.

Zordi Pignon d’Inn i ropran favèr pars in pé i pran sa pou fé karbiran, konm in spès gazoil. Bann zanglé, mi koné, la loué èk gouvèrnman malgash in gran karé la tèr par-la konm La Rényon pou plant pignon d’Inn. In pé d’tan té an pane é ala k’éstèr i ardémar.. ; mi antan d’isi in pé l’apré di amoin sa i intérès pa pèrsone. I intérès pa ? Figuir azot moin la parti dsi Temoignages.re : lo lartik moin la di azot lé pti, mé nana pa moins in sinkantène komantèr. Sé dir si in intérès demoun !

Pignon d’Inn  
Ala sak moin la trouv la dsi : I paré sa in plant médisinal. Avèk sa i gingn pirj demoun, détak la konstipasyon, songn bann doulèr rimatis, sikatriz boubou, arète l’émoraji. Solman li lé in pé toksik pou anvalé sé pou sa i fo méfyé… Mi koné d’moun pou fé arète boir zot famiy la kraz grin pignon d’Inn pou mète dann l’alkol ; i paré sa i korij in pé ! i di sa i fé avorté, mi koné pa si lé vré. Konm pti zanan tann, épi fèy zavoka ou i mète a fizé.

In kozman pou la rout : « La poin do koi fé in nos avèk in ké la mori ! »…
Zot i konpran kozman-la dann son sans prop. In ké la mori, sa na rienk lo zo dodan, donk la poin do koi fé in bon kari. Astèr sans figiré : i fo pa fé in gran problèm avèk in sinp kouyonad. Toulmoun lé dakor èk sa, mé kan sa i ariv aou, lé pa sir ou i réazi konm k’i fo… Fé travay zot koko ! Fé bouy zot matyèr griz ! zot va oir si tazantan nou lé pa dakor ansanm.


Kanalreunion.com