Oté

Justin a kour dinspirasyon ! Sé koué in konba po lo kréol ?

Justin / 7 novanm 2013

Moin na sou lé zieu diksyonèr Alain Armand : « Kréol rénioné-français », 15.000 mo.

Déza, français i ékri fransé an kréol ; po in Fransé, i fo ékri po li français !

Zot i rapèl zistwar po fé rir kan in Réyoné an Frans i arvyin isi é i fé sanblan ginye pi larg in morso dan son lang !

Po di pilon, li di a toué “mortié” ; po di kalou, li va dir a toué pilon ! Po di loto, li di voiture ! Parl pa li karo, li réponn a ou fer a repasé. Zot i souvyin in limoris té i di, la iblo po lo fénèt lavion, bon…

Na in koup tan, na zasosyasyon i milit po nout lidantité, partikilièrman marmay koloni, donk marmay lékol.

Mi koné inn i apèl Séméa. In zour zot i di, a koz toultan i sant « l’alouette est sur la branche », La Rényon nou na poin nout zoizo ? na poin papang ? dot zanimo, tang si la tèr, makabi dan la mèr, pakanké dann syèl ?

Romèrsi so bann militan in zour la pans konpoz dé-troi séga èk maloya, armèt nout sarèt bourik, nout pik-nik bor la ravine, marmay i zoué sou pyé mang.

La pli i tonm, somin lé long, mi sar pa lékol, ma giny débrouiy mon kary — po éksplik mon bann profésèr, mon bann paran, mi èm zoué dan la bou, nartroun lékol domin.

Sa in kiltir, a nou ni di pa « école buissonnière », nou di : « oté, toué la parti maron koué ? ». Na osi lékol maron. Ti kroi marmay i apran pa aryin déor, an kontak èk la natir ? Ti kal a li ant 4 mir èk tablo noir é ti di a li aprann léson, mé bayoun, amèn a li an plin nèr, mèt a li an sitiasyon dan son lanvironman !

Justin a kour dinspirasyon ? pa si sir k’sa !

 Justin 


Kanalreunion.com